Elkartasun ekimena Martuteneko espetxean: Urtea hasteko bafleetatik musika eta animo oihuak ordu erdiz

Martuteneko espetxearen albo batean bafle handi batzuk eta mikrofono bat kokatu eta 30 minutuz, urte berrira sartzeko falta zen denbora bete du herritar talde batek musikaz, animo oihuz eta piroteknia botaz. Barnetik euskal presoek oihuka erantzun diete eta hala, urte berrira elkarrekin sartu dira. "Lehen Andaluziaraino joan behar izaten genuen elkartasuna eramatera", adierazi diote ARGIAri ekintzaileek lekuan bertan.

Euskal preso ugari leihoetara igo dira, argazkian ikus daitekeenez.ç

"Euskal presoak maite dituzten herritarrak gara". Hala aurkeztu dute beren burua pertsona hauek ARGIAk galdetutakoan nor diren. 2021a amaitzear zela, Martuteneko espetxearen alboan jarri dira eta denak sorpresan harrapatuta, megafonia indartsu batekin elkartasun mezuek kartzelako murruak gainditzea lortu dute. Hamaika kantu eta oihu egin dituzte, baita piroteknia bota ere, urte berrira sarrera emanez. "Urte berri on denoi, ez zaituztegu sekula abandonatuko" gisako oihuak helarazi dizkiete kanpotik barnekoei. Gaur egun Martuteneko espetxean 17 euskal preso politiko daude. Hauen oihu eta txaloak entzun dira kanpotik, eta asko leihoetara atera dira. "Urte berri festa" honek ordu erdi iraun du, azkenean Ertzaintza etorri eta megafonia itzaltzeaz gain nahiko bortitz herritar hauek identifikatu dituen arte. ARGIAk ekimena dokumentatu duten bideo hauek jaso ditu.