Donostiako Udalak deitu du asteartean eguerdiko 12:00etan Alderdi Ederren egingo den kontzentraziora.
Igande goizaldean gertatutako bortxaketaren harira, astelehenean adierazpen instituzionala egin du Udalak eta biktimari zein familiari babesa erakustearekin batera, adierazi du “erabateko irmotasunez gaitzesten” duela hirian jasandako erasoa.
Zenbait iturrik jakitera eman duenez, konortea erdi galduta eta parte bat biluzik zuela hondartzan etzanda aurkitu zuen Ertzaintzak 30 urteko emakumea. Ospitalera eraman zuten eta medikuak azterketa egin ondoren, biktimak salaketa jarri zuen Antigua auzoko komisaldegian. Ertzaintza erasoa ikertzen ari da eta momentuz ez dago atxiloturik.
Larunbatean, emakumezko batek Zarautzen sexu-abusuak pairatzeagatik salaketa jarri zuen. Segurtasun-iturriek adierazi dutenez, gertatutakoa argitzeko ikerketa abian da baina momentuz ez dago atxiloturik.