2025-2026 ikasturtean, Medikuntza eta Erizaintza Fakultatean euskarazko 32 ikaspostu gehiago eskainiko ditu EHUk. Erakundeak adierazi du kopuru hori lortzea Eusko Jaurlaritzako Osasun Sailarekin eta Zientzia, Unibertsitate eta Berrikuntza Sailarekin izandako "lankidetzaren" eta bi aldeek hartutako "konpromisoen" emaitza dela. Guztira 200 plaza eskainiko dira euskaraz eta beste 200 gaztelaniaz.
Hasiera batean, EHUk hamasei ikaspostu gehiago eskainiko zituela iragarri zuen. Osasun Sailak bere kezka adierazi zuen, plaza nahikoak ez zirela argudiatuta. Alberto Martinez sailburuak esan zuen moduan, hamasei plazak "beharrezkoak" ziren, baina ez "nahikoak". Jaurlaritzaren asmoa 40 plaza gehiago eskaintzea zen. EHUk, ordea, eskura zituen baliabideekin kopuru horri aurre egiteko moduan ez zegoela azaldu zuen: "Gaur egun euskaraz beste 40 toki eskaintzea ez da errealista, baldin eta kalitatezko irakaskuntza bermatu nahi bada euskaraz".
Egoera horren aurrean, EHUk txosten bat prestatu zuen 40 plaza eskaintzeko hartu beharreko neurriak adierazteko. Azkenean, 32 ikaspostu eskaintzea adostu dute bi aldeek. Eusko Jaurlaritzak adierazi du eskaintza horri erantzuteko beharrezkoak diren baliabideak bermatuko dituela.