EHKOlektiboak agroekologiaren 11. topaketak burutuko ditu larunbatean Uztaritzen

  • EHKOlektiboak Euskal Herrian agroekologian ari diren laborariak biltzen ditu. Lau sailetan egiten du elkarte honek lan: laborantza biologikoa, bertako ekoizpenak eta salmenta zuzenak, elikadura burujabetza eta ikuspegi soziala. Datorren larunbatean, 17, Uztaritzen burutuko ditu bere 11. topaketak.

ARGIA @argia
2018ko otsailaren 15a

Duela hiru urte sortutako EHKOlektiboak 70 etxalde biltzen ditu  gaur, laborantza biologiko edo ekologikoan ari direnak eta beren label propioa daukatenak. Jokin Zaldunbidek Euskal Irratiei esan dienez, biologikotik aurrera jo nahi duten etxaldeak dira, nekazaritza unitate txiki eta hurbilekoetan antolatu nahi dutenak, produktuak zirkuitu laburretan komertzializatuz…

Zaldunbidek berak EHKOlektiboaren webgunean nabarmendu du agroekologiaren bidean aurrerago joateko asmo hori: "Agroekologia izen akademiko eta panpoxa alde batera utziz, ainitzetan entzuten dugu EHKOren egitasmoa, jadanik beste hainbat zigiluren erdian itotzera heldu dela eta oraindik nahasmen gehiago sortzen duela. EHKO ez da zigilu bat! EHKO saiakera bat da, erresestentzia bat, politika ildo argi bat, sorkuntza eremu bat, hartu-eman leku pare gabe bat, Euskal-Herri bat, autonomia bilatze bat, herritarren leku bat.

Larunbateko topaketetan 2017ko balantzea egin eta 2018ko proiektuak finkatzeaz gain, elkartearen zuzendaritza berrituko du EHKOlektiboak eta gai nagusiak lan taldetan aztertuko. “Zatoz gurekin agroekologia lantzera!” gonbidapena zabaldu die EHKOlektiboak herritarrei: “Bidaiak partekatuko ditugu Euskal Herriko xoko guztietatik”.

EHKOlektiboaren fundatzaileak 2014ko apirilaren 8an sagarrondo bat landatzen geroztik elkartearen egoitza den Garroko jauregiaren eremuetan.

 

Kanal hauetan artxibatua: Agroekologia  |  Laborantza ekologikoa

Agroekologia kanaletik interesatuko zaizu...
2018-06-04
Monsanto marka desagerraraziko du Bayerrek berau 53.373 milioi eurotan erosi ondoren

EAEBetako transgeniko eta pestiziden korporazioak irudi oso txarra du mundu mailan. Bayer saiatuko da horri buelta ematen.


2018-03-25 | Garazi Zabaleta
Baztango Agroekologia Eskola Herritarra
Bigarren ikasturtea martxan

Baztango herritarrek agroekologiaren inguruan ikasteko aukera izanen dute Agroekologia Eskola Herritarraren bidez. Iaz sortu zuten ekimena, Baztango hainbat herritako zortzi erakundek elkarlanean egitarau bateratua aterata. “Dibulgazioa du helburu eskolak, herritarren kontzientzia pizteko, baina ez dugu horretarako bakarrik sortu”, azaldu du Joseba Otondo alkateak ekimenaren aurkezpen prentsaurrekoan.

Erakundeen-parte hartze zabalagoa eta eskaintza berritua aurten

Iazko... [+]


2018-03-01 | ARGIA
Zuhaitz mugarroei buruzko Europako biltzarra burutzen ari dira Saran

Saran martxoaren 1etik 3ra burutzen ari dira Zuhaitz mugarroen 2 biltzarra. Elikagaien ekoizpenean soroetan zuhaitzak integratzearen abantailak lantzen dituen agroforesterian gero eta interes handiagoa pizten dute egurretarako bezala aziendak elikatzeko lepatu edo mugarrotutako arbolek.


2018-01-25 | Andoni Mikelarena
Arabako Batzar Nagusiek agroelikadura estrategia jasangarria diseinatu dezala eskatu diote Aldundiari

EH Bilduk aurkeztutako proposamena babestu dute Arabako Batzar Nagusietako alderdi guztiek. Aldundiak herrialdeko agroelikadura estrategia jasangarri bat adosteko prozesua diseinatu beharko du.


2017-12-24 | Garazi Zabaleta
Ttak Kolektiboa
"Aliantzak dira proiektuak garatzeko aukera polit eta bakarrak"

Bizkaiko Ttak Kolektiboko kide da David Lopategi. Lantaldea osatzen duten zazpi lagunak lehenagotik ezagutzen baziren ere, Baserritik Mundura ikastaroko lehen edizioan hasi ziren elkarlanean. “Denok genbiltzan lehenagotik elikadura burujabetzaren eta agroekologiaren inguruan lanean: batzuk baserritarrak ziren, beste zenbait eragile sozialetako kide”, azaldu digu Lopategik. Badute batzen dituen beste zerbait ere: “Lan kolektiboaren sinesle amorratuak gara”. Lan kolektibo... [+]


2017-07-19 | Aritz Loiola
ARGAZKIAK: Hasi da La Via Campesinaren nazioarteko konferentzia Derion

Jendez mukuru izan da Derioko apaiztegi zaharreko eliza zena, Biltzarraren inaugurazio ekitaldian. Dantzak, kantuak eta musikak hartu dute lehenbiziko ordua, mezu politikoek bigarrena. Amaieran, azken urteetan La Via Campesinarekin bat egindako elkarte berrien aurkezpena egin da. Gogorarazi dutenez, 200 milioi laborari baino gehiago ordezkatzen ditu antolakundeak dagoeneko, 70 herrialde baino gehiagotan. Aritz Loiolaren argazkiak segidan.


2017-07-19 | Unai Brea
Mundua elikatuz mundua aldatu; abian da nekazari txikien biltzar erraldoia

Pertsonak elikatzeko nekazarien beharra du munduak. Eta modu egoki eta jasangarrian egiteko, edozein ereduk ez du balio. Hala aldarrikatu du Miguel Blancok, Espainiako Estatuko nekazari elkarteen COAG federazioko idazkari nagusi eta hizlari kementsuak, La Via Campesinaren VII. Nazioarteko Biltzarrari hasiera ofiziala emateko egindako ekitaldiaren amaieran. Datozen egunetan eredu horren aldeko estrategiak finkatzen saiatuko dira mundu osotik Euskal Herrira etorritako ehunka ordezkariak.


Baserritarren protesta Aldundiaren aurrean: "Erraustegiak elikadura burujabetza kutsatzen du"

Baserria XXI elkarteko laborariek, agronekazaritzan ari diren baserritar gazteek, erraustegiaren aurkako protesta eraman dute Gipuzkoako Foru Aldundiaren atariraino. Eguerdiko 12:00etan hasita, antzerki labur batean irudikatu dituzte nekazariak herritarrentzako elikagai sanoak ekoizteko lanean, ondoren errausketa inposatzen dutenak –Markel Olano aldun nagusiak hezur-mamituak– barazkiok kutsatzen, azkenean baserritarrek kutsatzaileak airean ihesi bidaltzen dituzten arte.


Ehkolektiboa: Laborariak agroekologiaren bidean
MULTIMEDIA - erreportajea

Zer da agroekologia? Galdera horri erantzuteko eta EHKOlektiboa ezagutzera emateko, bideo bat plazaratu dute. EHKolektiboak Euskal Herrian agroekologian ari diren laborariak biltzen ditu. Lau sailetan egiten dute lan: laborantza biologikoa, bertako ekoizpenak eta salmenta zuzenak, elikadura burujabetza eta ikuspegi soziala.


Eguneraketa berriak daude