Egunkariako epaituak pozik agertu dira, eta absoluzioa "espero zitekeen" arren, orain arte "jarrera prebentiboa" agertu dute, Auzitegi Nazionala tartean izanda "edozer gauza espero behar" baita haien ustez. Garaipena izan ote den galdetzen diote beren buruari, zazpi urtez "akusatuaren aulkiaren zigorpean" egon eta gero, baina "sozialki oso barneratua dagoen pertzepzioa" dela esan dute eta ez diotela "poz hori ukatuko". Euskal gizarte zabalaren babesa izan dute aipagai, bai eta Katalunian eta Madrilen izan duten laguntza ere: "Protagonista euskal gizarte zabala izan da, bere jarrera beroak birrindu egin du kasu honen atzean zegoen bultzada politikoa". Gogoan izan dituzte beste makrojuzio batzuetan epaitu dituzten edo auziperatuak dauden kideak, hala nola Udalbiltzakoak edota Eginekoak eta oraingo epaiak haietan eragin baikorra izatea espero dute. Kalte ordainez hitz egiterakoan, kaltearen ordaina non dagoen galdetu dute: "Errudunak akusatuen aulkian al daude?". Hala ere, argitu dute hau "amaieraren hasiera" besterik ez dela eta auzia oraindik ez dela amaitu, Gorenean jarri litezkeen balizko helegiteak eta "pieza ekonomikoa" hor baitaude. "Beraz, ezin da defentsa jaitsi, erne mantentzeko eskatzen diogu euskal jendarteari".

Bukatzeko, "esker zintzoa" adierazi nahi izan diete Egunkariako epaituek euskal gizarteari eta laguntza eman dieten guztiei. Jainarazi dute eskertza ekitaldi bat egingo dutela hilaren 25ean Bilboko Euskalduna jauregian.

Egunkariaren itxierari buruz artikulu ugari publikatu da azken orduetan.