70.000 sarreratik gora jaso ditu Egungo Euskararen Hiztegiak. Ibon Sarasola hizkuntzalaria izan da proiektuaren buru eta Pello Salaburu, Josu Landa eta Josu Zabaleta aritu dira lanean.
Hamabost urteko lanaren ondoren, sarean aurki daiteke Egungo Euskararen Hiztegia (EEH), XXI. mendean idatzitako euskarazko literatur eta prentsa testuetan oinarritutako hiztegia. Euskal Herriko Unibertsitatearen webgunean argitaratua dago, Euskara Institutuaren baitan landu delako. Oinarrian duen corpusa modernoa da, berriena da, eta horrek egiten du bereizgarri, Ereduzko Prosa Gaur (EPG) erabili delako testu aukeraketetan. Apurka-apurka osatzen eta berritzen joan dira hiztegia, eta pasa den astean iragarri zuten amaitu dutela prozesua. Ibon Sarasola hizkuntzalariak hartu zuen proiektuaren gidaritza, eta aldean izan ditu egiletzan Pello Salaburu, Josu Landa eta Josu Zabaleta.
Lanean aritu direnen arabera, Egungo Euskararen Hiztegia, metodologikoki, Orotariko Euskal Hiztegiaren (OEH) ildo beretik jorratu da, nahiz eta OEHren oinarrian 5 milioi hitzeko masa dagoen –1970. urtea baino lehenagoko testuetatik hartua–, eta EPG corpusarenean berriz, bost aldiz handiagoa. Hain zuzen ere, Euskaltzaindiak Hiztegi Batua atera ondoren idatzi diren testuetan oinarritzen da azken hau.
Egungo Euskararen Hiztegiak egungo euskara jasotzen duen hiztegi zehatz eta zabalena da, erabileran oinarritutakoa, 70.000 sarreratik gora ditu eta 530.000 adibide inguru.
2017an B letrarekin amaitu eta prentsaurrekoa eskaini zuten, amaitzen zihoazela esateko. Hona hemen orduko hartan Berria egunkariak jaso zuen informazioa.