Joan den astean jakinarazi zuen Gernikako Astra Koordinadorak eraikineko obrak ia amaituta daudela eta herritarrak arduratuko direla kudeaketaz. Larunbatean prentsaurrekoa eskaini zuten hori nabarmentzeko, baita proiektuaren izaera gogora ekartzeko ere: “Astra kulturarako fabrika soziala da: arlo publikoaren kudeaketan jendartearen parte-hartze zuzena bultzatzen duen espazioa”.

Proiektuak kulturaren ikuspegi zabala lantzen duela adierazi zuten, ekoizpen artistikoaz gain pentsamendu kritikoa eta esfera publikoaren demokratizazioa bultzatzea ere helburu dutela.

Hil honetan Astrak ateak zabalduko dituen arren, inaugurazioa abenduan izango dela azaldu zuten. Tarte horretan baliabidez hornituko dute oraingoz hutsik dagoen eraikina.

Pauso batzuk atzerago dabil Tabakalera, nahiz eta kultura zuzendari eta kudeatzaile berriak izendatuta, geldialdiarekin bukatu nahi duen. Problema ugari izan ditu Donostiako Kultura Garaikideko Nazioarteko Guneak martxan jartzeko. Besteak beste, Tabakalera gidatzeko aukeratutako pertsonak, Joxean Muñozek, dimititu egin zuen duela bi urte erakunde publikoekin izandako desadostasunak tarteko (Eusko Jaurlaritza, Gipuzkoako Foru Aldundia eta Donostiako Udala proiektuko partaide dira).

Geroztik ontzi huts baten antzera zebilen Tabakalera, noraezean. Lemazain berriak ekainean izendatu zituzten eta joan den igandean prentsaren aurrera agertu ziren Ane Rodriguez kultura zuzendari berria eta aurrerantzean kudeaketaz arduratuko den Haritz Azkarraga. Muñozek landutako proiektutik abiatuta lan egingo dutela esplikatu zuen Rodriguezek, zehaztasun gehiegi eman gabe.

Datozen hilabeteetan “hiriaren beharrak” zein diren ezagutzeko lanean ariko direla adierazi zuen. “Edukiontzia garrantzitsua da, baina ez du zentzurik ez badugu ingurunea kontuan hartzen” esan zuen Rodriguezek.

Informazio gehiago:

Astra, esperientzia parte-hartzailea. Leire Lopez Ziluagak Larrunen argitaratutako artikulua (2011-12-15).