2014an kontsulta egin nahi du Kataluniako Generalitateak Espainiako estatuarekin adostuta. Madrilek kontsultari ateak itxiz gero baina, 2016rako plebiszitu hauteskundeak deitu ditzakeela azaldu du Artur Masek Catalunya Radio irratian. “Azken baliabidea” dela azpimarratu du Espainiarekiko talka eragingo bailuke.
“Espainiako gobernuak edozein bide politiko onartzea ukatzen badu eta legedia freno moduan erabiliko badu, beti geratuko zaigu azken marko legal bat: hauteskundeak”, esan du Masek.
Aipatu plebiszitu bozak hurrengo hauteskunde autonomikoetan egingo lirateke, hau da, 2016an. "Plebiszitu hauteskunde batzuetan, elkar edo bananduta, baiezkoaren eta ezezkoaren alderdiak aurkeztuko lirateke", azaldu du Generalitateko presidenteak.
Masek “azken aukera” bezala aipatu du kasua eta urte bukaera arteko epea jarri dio Espainiako gobernuari negoziaketekin hasteko.