Birusaren inguruko informazioa ezagutzeak laguntzen du izu hori baretzen. Ebola aztertu eta ezagutu duten medikuek badituzte oinarrizko datuak birusari buruz, baina oraindik erantzunik gabeko galderak daudela argitaratu du Xavier Aldekoa kazetariak Sentit Critic-en.

Ezjakintasuna eta adituen prudentzia ulertzekoak direla dio. Ebola gaixotasun ezezaguna izan da orain arte herrialde garatuetan; 1976tik 2013ra bitartean 1.500 pertsona inguru hil dira, denak herrialde pobreetan.

Egiazko informazioa zabaltzerakoan hedabideek eta agintariek paper garrantzitsua jokatzen dutela uste du Aldekoak.

Zer dakigu ebolari buruz?

Kutsatzeko modua: Kutsatutako pertsonaren isurkinekin kontaktu oso zuzena izanda transmititzen da ebola. Baina kutsatuak gaixotasunaren sintoma argiak izan behar ditu (sukar arina ez da zantzu argitzat hartzen).

Gaixoaren edo hilotzaren objektuak ukituz gero ere kutsa daiteke.

Isurkinik kutsakorrenak: Odola, oka eta gorotzak dira kutsakorrenak. Hala ere, Osasunaren Munduko Erakundeak (OME) semenean, gernuan eta amaren esnean ere birusaren aztarnak aurkitu izan ditu.

Listuaren, malkoen eta izerdiaren bitartez ere kutsatu daitekeela diote zenbait ikerketak, baina gaixotasuna oso maila aurreratuan dagoenean bakarrik.

Airetik ez da kutsatzen: OMEk askotan errepikatu du aire bidez ez dela ebola transmititzen. Gaixoak eztul egin eta listu tantaren bat bestearen ahora edo zauri ireki batera iritsi beharko litzateke kutsatzeko.

Orain Espainiako Estatuan piztu den beldurra, Sierra Leona, Liberia eta Gineako azken hilabeteetako eguneroko ikara da. 3.879 pertsona hil ditu dagoeneko ebolak, eta 8.000tik gora kutsatu dira, OMEren datuen arabera.

Baina zifra horiek ere ez dira ziurrak. Hiru herrialde afrikarretako osasun sistema kolapsatuta dago, eta ohe falta medio, gaixo asko ospitaleetako pasilloetan bertan edo etxeetan hiltzen dira, Aldekoak dioenez.