Zarauzko EAJko zinegotzi Maite Garrastazu eta bere familiak 2010ean aurkeztu zuten Aiako Udalean Talaimendin duten baserria berritzeko baimena. Bi urte beranduago etxebizitza berri bat eraikitzeko obra-baimena aurkeztu zuten, baserri zaharretik 200 metrora eta lur eremu handiagoan.

Aiako Udalak Garrastazu familiari etxebizitza berria eraikitzeko jarritako baldintza baserri zaharraren eraiste proiektua aurkeztea izan zen, baina ez dute halakorik egin. Obra 2014ko azaroan hasi zen eta sustatzaileen arabera bukatuta dago. Hamaika gela eta hamaika bainugela ditu eraikin berriak.

Gipuzkoako Aldundiak baimentzen du inguruan parapente hegaldiak egitea, otsailetik ekainera izan ezik, orduan belatz handi bikote batek kumeak hazten baititu bertan. Talaimendin parapentean ibiltzen diren Gipuzkoako Aire Kirol Federazioko kideek duela bi urte antzeman zituzten obrak baina tontorrerako bidea hesiz beteta zegoela ohartutakoan jarri zuten salaketa, SOS Talaimendi plataforma sortzearekin batera.

Auzia epaitegietan

Azpeitiko epaitegi batek eta Donostiako beste batek izapideak egin dituzte eraikinaren aurka pasa den urteko irailean eta abenduan. Aire Kirol Federazioak Aranzadi elkarteak eginiko txostena aurkeztu du: hesiek ingurua eta belatz handiak kaltetzen dituela dio.

Aiako Udalak hirigintza-espedientea abian jarri zuen salaketaren ondoren, baina bi hilabeteren buruan amaitutzat jo zuen. Udalaren arabera etxebizitzaren tamaina handia justifikaturik dago “familiaren ezohiko egituragatik, familia ugaria izateagatik”; kalteturiko baserritik 200 metrora egotea “lur-irristatze” arriskuagatik dela dio eta hesiak inguru babestuan ez daudela ondorioztatu du.

Arartekoak egindako txostena da denetan zorrotzena. Haren arabera eraikinak ez du EAEko Lurraren Legea betetzen, “argi eta garbi azaltzen baitu ezin dela etxebizitza berririk eraiki inguru babestuetan”. Azpeitiko epaitegiak “arau-hauste argirik” ez dagoela ondorioztatu du eta Gipuzkoako Auzitegiak erabaki beharko du orain ikertzen jarraituko duten ala auzia artxibatuko duten.