1.223 milioi euroko gastua eta 1.228 milioiko sarrerak izan dituzte EAEko ikastetxe pribatu eta kontzertatuek 2021ean. Sarrera horietatik 777 milioi euro dirulaguntza publikoak izan dira, Eustatek azaldu duenez.
469 ikastetxe, 214.000 ikasle eta 21.500 langilek osatzen dute irakaskuntza pribatuaren sarea eta 2021. urteko gastua 2018an baino %4,04 handiagoa izan da, Eustat Euskal Estatistika Erakundeak aurkeztu dituen datuen arabera. Gastuaren gehiengoa langileetara bideratu da (%77) eta batez ere unibertsitate aurreko irakaskuntzan kontzentratu da gastua (%84); gainerakoa unibertsitate zentroetara (%14) eta arte-irakaskuntza zentroetara (%2) bideratu da.
Ikasleko irakaskuntza-kostua 5.026 eurokoa izan da, 2018an baino %14 gehiago.
Diru sarrerak
Eustaten datuetan ikus daitekeenez, ikastetxe pribatuen sarreren %98,9 sarrera arruntei dagozkie eta horien iturri nagusia dirulaguntza publikoak dira: sarreren %64 (guztira 777 milioi euro). Dirulaguntza publikoek bi puntu egin dute gora, 2018arekin alderatuta.
Familiek ordaintzen dituzten kuotak diru sarrera arrunten %32,7 dira (397 milioi euro).
Diru sarrera orokorren gainerako %1,1a kapital-sarrerei dagokie.