Durangoko Azokaren lehen momentutik bisitari asko erakarri ditu Landako guneak

  • Indartsu hasi da Durangoko Azokaren 52. edizioa. Landako guneak ateak irekita, ez da denbora asko behar izan pasillo guztiak jendez betetzeko.

ARGIA @argia
2017ko abenduaren 06a
Lehen momentutik jende ugari dabil Durangoko Azokako pasilloetan barrena.

10:30ean zabaldu dituzte Landakoko ateak eta pixka bat geroago egin dute sarrera-ekitaldi ofiziala, Azoka antolatzen duen Gerediaga elkarteko ordezkariekin eta erakunde publikoetako agintariekin.

400 nobedade eta 200 kultur ekitaldi inguru antolatu dituzte Azokaren inguruan lehenbiziko egun honetan.

Besteak beste, ikus-entzunezko emanaldi berezi baten lekuko izango da Durangoko Azoka lehen egunean: aurtengo kartela egin duen Jose Antonio Sistiagaren Impresiones en la alta atmósfera ikusi ahal izango da Irudienean. Film horretako irudi batetik abiatu da artista 52. Azokako kartela osatzeko eta ezohiko proiekzio horrek ginda jarriko dio aurtengo afixari.

Ez da abenduaren 6ko zita bakarra izango, noski: ikus-entzunezkoetatik atera gabe, Franck Dolosorrek Estitxu musikariari buruz egin duen dokumentala ikusteko aukera ere izango da; baita Irati Gorostidik eta Arantza Santestebanek zuzendutako Euritan film laburra ere, zeina aurtengo Kimuak katalogoan hautatua izan den, zeresan franko emanez.

Liburuei dagokienez, Silvia Federiciren Caliban eta sorgina-ren aurkezpena nabarmentzen da lehenbiziko egunean, bibliografia feministan leku garrantzitsua daukan saiakera baita eta aurreneko aldiz irakurri ahal izango da euskaraz.

Diskoetan, izen handi bat estreinaldirako: Rafa Ruedak bakarkako bosgarren lana, Hiri kristalezkoa aurkeztuko du zuzenean Ahotsenean. Egun berean promesa gazte batzuk ikusteko parada ere izango da, hala nola Perlata talde arrasatearra, agertoki gainean duen jarrera freskoagatik dagoeneko ezagun egiten hasi dena.

Programa osoa Durangoko Azokaren webgunean kontsultatu daiteke.

Bestelako berrikuntzak ere badira, hala nola, aurten ez dela Argizaiola saririk banatuko. Durangoko Azokak urtero euskal kulturan ibilbide nabarmena egin duen norbaiti ematen zion sariaren ordez, aurrerantzean sormen beka bat emango dute, aurtengo lemak (“Sormenaren lurraldea DA”) islatzen duen espirituarekin bat eginez.

 

Kanal honetan artxibatua: Durangoko Azoka 2017

Durangoko Azoka 2017 kanaletik interesatuko zaizu...
2017-12-11 | Miren Osa Galdona
110.000 lagunek bisitatu dute Durangoko Azoka, 7,2 milioi euroko eragin ekonomikoa utziz

Amaitu da Durangoko Azokaren 52. edizioa. 110.000 bisitari izan dira sormenaren lurraldeak  eta 7,2 milioi euroko eragin ekonomikoa izan du, bisitari kopurua eta bakoitzak zer nolako gastua egin duen kontuan hartuta. Hurrengo urtean lehen aldiz emango dute Sormen Beka.


Imajinatu ezin dena egiteaz

Orain zail egiten da imajinatzea Azoka hura, artistek beren lanak erakusteko espaziorik gabekoa, bisitariari eduki askoz gutxiago eskaintzen ziona. Orain ezagutzen dugun Azoka hau orduan imajinatzea bezain zaila, gutxi gorabehera.


Amerika deskubritzen

Azokaren azken aurreko egunera iritsita, pixka bat “Azokatuta” gabiltzala esateko moduan gaude. Problema, hain justu, artzainen kontrakoa da hemen: bakoitzak urte osoa bere kasa igaro ondoren, bat-batean jendez inguratuta ikusten duela bere burua pabilioi honen erdian.


Gazteekin obsesionatuta bizi den kultura hau

Gazteak: ezezagun handi hori. Zer pasatzen da gaur Azokako pasillo guztietan barrena zebiltzan izaki horien buruetatik? Nola iritsi dira hona? Zer bilatzen dute? Euskal kulturaren obsesioetako bat dira.


2017-12-07 | ARGIA
Gazteak izango dira protagonista Durangoko Azokako bigarren egunean

Durangoko Azokak urtero gordetzen du egun bat gazteak euskal kulturara erakartzen saiatzeko. Aurten osteguna da egun hori eta egitaraua ikasleei zuzenduriko jardueraz beteta dator.


Azkenak
EGILEA
Eguneraketa berriak daude