Asteazken arratsaldean Infernua Bizirik-ek sare sozialen bidez jakinarazi zuenez, filtrazioen arabera arratsalde horretan ekingo zioten Infernua desalojatzeari. Mezuarekin batera dei egin zioten jendeari, elkartasuna adieraztera gerturatu zedin. Hala egin zuen hainbatek, harik eta Ertzaintzak eta Udaltzaingoak kanporatu zituzten arte. Irutxuloko Hitzak jaso zuenez, ertzainek adierazi zieten "kaleak garbitzera" gerturatu zirela. Hala informatu zuen bertatik jarraipena egiten zebilen Irati Salsamendik:

Atzo "auzoa garbitzera" etorri eta gero Infernuaren desalojoa gauzatzen ari direla ematen du Ertzaintza eta Udaltzaingoa. Kalean elkartasuna adierazten ari zen jendea kanporatu dute indarkeriaz#infernuabizirik pic.twitter.com/k3ueq1k6fn

— Irati Salsamendi (@IratiSalsamendi) November 5, 2020

Hustea ostegun goizean, epailea aginduarekin hurbildu ostean, gauzatuko zela jakinarazi zieten ertzainek. Esandakoari segi, goizean goizetik ekin dio husteari Ertzaintzak. Polizien arabera, hiru pabiloi hustera bertaratu dira. Infernua Bizirikek adierazi duenez, huste-agindurik ez dute erakutsi.

Hainbat herritar bertaratu dira bertan bizi direnei elkartasuna adieraztera, baina ertzainek ez diete utzi auzuneko sarbidea igarotzen. Eguerdirako kanporatu dituzte bizilagun guztiak.

Infernua Donostiako Antiguo auzoan dago, hiriaren kanpoaldean. Hainbat urtez hutsik egondako eraikinetan hartu dute orain arte aterpe dozenaka etxegabek. Donostiako Udalak, baina, bestelako erabilera eman nahi dio espazioari: Infernua dagoen tokian eraiki nahi ditu 540 etxebizitza. Alabaina, udalak adierazi du zerikusirik ez duela huste aginduarekin, eta "etxebizitza pribatu batzuen etxegabetze agindua da, jabeek hala eskatuta".

SOS Arrazakeriakek azpimarratu duenez, pandemia egoera betean baliabiderik ez duen jendea aterperik gabe uzteak bazterkeria egoerak areagotu egiten du.

Udaletxe aurrean

SOS Arrazakeriak deitu du Donostiako Udaletxe aurrean, Alderdi Eder eta Ijentea kaleen artean, Infernuaren hustutzea salatzeko.

⚠️⚠️⚠️ Kontzentrazioa ⚠️⚠️⚠️
🛑🛑🛑 Concentración 🛑🛑🛑 pic.twitter.com/CXvpIvYaky

— SOS Arrazakeria Gipuzkoa (@Sos_Arrazakeria) November 5, 2020