“Ez genuen arrazoi ekonomikoak medio zabaldu Donostiako laborategia, eta ez dugu arrazoi ekonomikoengatik itxiko”, azaldu dute Garoaren blogean. “Erabaki pertsonala da hartu duguna, erabaki intimoa. Erabaki zaila eta erabaki irmoa”.

Otsailaren 11ra arte egongo da zabalik Donostiako Garoa. Argitu dutenez, hilabete honetarako prestatuta zeukaten programatik Luis Haranburu Altunaren liburu aurkezpena (otsailak 9), Maite Carrillo artistak bere erakusketan egingo duen bisita gidatua (otsailak 10) eta gaztelaniazko azken irakurle taldea (otsailak 22) mantendu egingo dira.

Bertan behera utzi dute Aitor Gorosabelek otsailaren 24an eman behar zuen kontzertua, Elliot Murphyk martxoaren 31n eskaini behar zuena Tabakalerako Kutxa Kultur espaziora pasa dute; eta Julio Villarren ‘Viaje a pie’ (otsailak 16) eta Ibon Sarasolaren ‘Bitakora kaiera’ (otsailak 15) aurkezpenak, Zarauzko liburu-dendara pasako dira.

Kulturzaleen erreferente

Zarauzko Garoa liburu dendaren hedapen bezala sortua, Gipuzkoako hiriburuko kulturzaleen erreferentziazko puntu bihurtu zen berehala. Hori lortzeko lana beltz egin zuten proiekturaren lehenbiziko urtean: 200 kultur ekitaldi inguru izan ziren lehenbiziko 365 egunetan.

Zabaleta kaleko lokalaren inguruan sortu den kulturzale-komunitatearekin akordatu dira ixteko erabakia ematearekin batera: “Eskerrak eman nahi dizkiegu denei. Groseko bizilagunei eta Donostian bidelagun izan ditugun irakurle, idazle, artista, musikari, sortzaile eta eragile kulturalei”.

Donostiako lokala itxi arren, proiektuak bizirik jarraitzen duela ere nabarmendu dute, “Garoa ez baita leku bat, ez baita lokal bat. Garoa etengabe aldatzen joan den eta joango den proiektua da”.