Asteazkenetik igandera proiektatuko dituzte filmak Tabakaleran, jatorrizko bertsioan beti, batzuetan gaztelaniazko azpitituluekin eta beste batzuetan euskarazkoekin –bakoitzaren portzentajeak ez dituzte argitu oraingoz–. Modu oneko eskaintza: 3,5 euroan jarri dute sarreraren prezioa.

Pelikulak eskaintzeaz gain, “gogoetarako eta ezagutza partekatzeko topagunea” ere izan nahi du Egiako aretoak, Tabakaleratik nabarmendu dutenez.

Bost ardatzetan oinarritzen den eskaintza

Zinegile garaikideen filmografian oinarrituko den “Fokuak” saila da Tabakaleraren zine-eskaintzaren bost zutabeetan lehena; eta Andres Di Tella zuzendari argentinarrari eskainitako zikloarekin abiatuko da. Donostian aurkeztu berri du 327 cuadernos izeneko azken lana Di Tellak, Zinemaldiko Zabaltegi sailean.

Nazioarteko zinema jaialdiek eta banatzaile independenteek eskaintzeko daukatena erakutsiko du “Zine garaikidea” ildoak. Horren barruan, urriaren 2an Jonas Truebaren Los exiliados romanticos proiektatuko dute.  

Gai zehatzen inguruko zikloak ere eskainiko dituzte –haurtzaroa, nerabezaroa eta gaztaroa gai nagusitzat izango dituen “Aro atomikoa” eta “zinea eta arkitektura” dira iragarri dituzten lehenbizikoak–.

“Gutun zuriak” izeneko ekimenarekin berriz, Tabakalerak erreferentziazkotzat jotzen dituen jaialdi, kritikari, artista eta programatzaileak pasako dira Tabako fabrikatik.

Eta igande goizetan ere ez da faltako eskaintzarik, formatu berritzaileetan: “zine-vermuta”, “brunch-zinea” eta publiko orokorrarentzako moduko saioak eskainiko dituzte, besteak beste, hilean behin.

Filmategia eta Nosferatu zikloa ere bai

Beste berrikuntza zera da: Euskadiko Filmategiak lehen aldiz zine areto propioa edukiko duela eta beraz, urtetan artxibatutako lanak publikoari eskaintzeko modua izango duela.

Horretaz gain, filmategiak Donostia Kulturarekin batera antolatzen duen Nosferatu zikloa ere Parte Zaharreko Antzoki Zaharretik Tabakalerara pasako da. Aurten Krysztof Kieslowski zuzendari poloniarraren lanari eskaini diote atzera-begirakoa –Okendo Kultur Etxean berari buruzko erakusketa ere ikus daiteke urriaren 24ra arte, zikloarekin paraleloan–.