Kargugabetze “automatikoa” jakinarazi du Meritxell Batet Kongresuko presidenteak. Kongresuak lau diputatu gutxiagorekin aritzeko aukera zabalik uzten dute Kongresuko legelariek, gehiengoak eraldatuko lituzkeena.
Oriol Junqueras, Jordi Sánchez, Jordi Turull eta Josep Rull ez dira jada Espainiako Kongresuko diputatuak. Kongresuko mahaiak erabaki du PSOE, PP eta Ciudadanos alderdietako ordezkarien aldeko bozkarekin eta Podemosen aurkakoarekin. PSOE eta Podemosek gehiengoa dute mahaian. Mahaia Kongresuko legelarien txostena jaso ondoren bildu da erabakia hartzeko. Legelariek diputatu presoak kargugabetzearen alde egin dute.
Asteazkenean, Kongresuaren presidentetza hartu berritan, Meritxell Batetek Epaitegi Gorenari bideratu zion auzia, erabakia juridikoa izanik botere judizialak hartu behar zuela argudiatuta. Ostegun goizean Manuel Marchenak zuzen eta lehor erantzun zion Bateti, eskumena Kongresuarena dela adieraziz. Kongresuko mahaiak kamerako zerbitzu juridikoei aholkua eskatzea erabaki zuen PSOE eta Podemosen aldeko bozkekin.
Kongresuko gehiengoak eraldatzeko arriskua
Legelariek Prozedura Kriminalerako Legearen 384bis artikulua aplikatzea proposatu dute, ez kameraren barne araudia. Kongresuko mahaiari adierazten diote kargugabetzeek dirauten bitartean bere eskumena dela Kongresuak izango dituen diputatu kopuruaren inguruan erabakitzea. Horrek ateak zabalik utziko lizkioke 346 diputatuz osatutako Kongresu bati (egun 350 dira). Gehiengoen jokoa nabarmen aldatuko luke erabaki horrek, PSOEri gobernagarritasunerako aukera berriak zabalduz.