Astelehen goizaldean 23 palestinar gutxienez hil dira Gazako hiriburuan, tartean bi haur gosetearen ondorioz. Igandeaz geroztik gutxienez 50 etxebizitza eraikin eraitsi ditu Israelek, beste 100 kaltetu, eta desplazatuen kanpamenduetako 200 denda suntsitu.
Israelek Gaza hiria hustu eta okupatzeko bere egitasmoan aurrera egiten jarraitzen du. Al Jazeerak argitaratu duenez, astelehen goizaldetik, albiste hau argitaratzeko orduan, gutxienez 23 palestinar hil dituzte Gaza hirian, horietariko hamalau etxebizitzen edo desplazatuen kanpamenduen aurka egindako erasoen ondorioz. Hildakoen artean bi haur ere badira; Nasser ospitaleak jakinarazi duenez, gosez hilak. Gazako Osasun Ministerioaren arabera, 2023ko urriaz geroztik gutxienez 387 palestinar hil ditu Israelek inposatutako goseak, horietariko 138 haurrak.
Heriotzak ez du etenik Gazan. Ostiralean, esaterako, 2023ko urriaren 7tik 700 egun bete ziren egunean, 83 palestinar hil zituen Israelek, tartean janari bila ari ziren 31 pertsona.
Eraikinak bonbardatu desplazamendua behartzeko
Palestinako Defentsa Zibileko bozeramaile Mahmoud Basal-ek salatu du igandeaz geroztik 50 etxebizitza eraikin baino gehiago eraitsi dutela Israelek Gaza Hirian, eta beste ehun eraikinetan behintzat kalteak eragin, tartean milaka herritar hartzen dituzten etxe orratzak.
Basalek, bestalde, jakinarazi du Israel desplazamenduen kanpalekuz inguratuta dauden eraikinak bonbardatzen ari dela, eta ondorioz gutxienez 200 denda suntsitu dituela. Bonbardaketa horiek sistematikoak direla salatu du, eta beren helburua herritarren desplazamendua behartzea dela.