2025eko Cascanteko jaien (abuztuaren 30etik irailaren 7ra) egitarauan emakumeen eguneko ekimenak iragartzeko, udalak emakume gazte sexualizatu baten argazkia erabili duela salatu du Candela elkarteak komunikatu batean. UPNren gehiengo osoa duen Cascanteko Udalak ere zabaldu du sare sozialetan, baina ezer gehiago adierazi gabe:

"Cascanteko Candela emakumeen elkarteko batzarretik gure haserrea eta protesta sutsua adierazi nahi dugu Udalak antolatzen duen 'Emakumearen Eguna' iragartzeko egitarauan jarri duen argazkiagatik. Argazki horrek borrokatzen dugunaren aurkakoa den guztia irudikatzen du, bai gure jarduera antolatuetan, bai gure eguneroko bizitzan: matxismo ozpindua, emakumeak beren alderdi intimoenetik edo beren gaitasun fisikoengatik erakusten dituenak.

Programa hori banatuta eta argitaratuta dago, beraz, ahal den moduan zuzentzeko eskatzen dugu, bai eta, etorkizunean, hain akats larririk ez egiteko berrikuspen sakonagoak egitea ere. Gure hiriaren irudi negargarria ematen dute, eta urte osoan berdintasunaren eta emakumeenganako errespetuaren alde borrokatzen eta lan egiten duen herria gara".

PSNko bozeramaile José Luis Gómezek ere salatu du udalak zabaldutako egitaraua: "Ulertezina da horrelako irudi bat egitarauan jartzea hainbeste ikuskapenetatik igarotzen den dokumentu batean, are gehiago hasieran programaren azala izan behar zenean. Horrekin gure herriaren irudi negargarria ematen dugu".