Zientzia-dibulgazioa saritzeko erreferentziazko sariak izan dira CAF-Elhuyarrekoak. Antolatzaileek 31. edizioa martxan zegoela etetea erabaki dute, "sariketa behar bezala egiteko baldintzarik ez dagoelako".
CAF-Elhuyar sariek "zientzia eta teknologia arloko gaien eta ikerketen euskarazko kazetaritza lana saritzea eta aintzatestea" dute helburu. Azken ekitaldia iaz egin zuten Donostiako Tabakaleran.
Aurten, sariak etetea erabaki dute, 30 urte eta gero. "Baldintza txukunetan" ezin dutela sari banaketa ospatu arrazoitu dute prentsa ohar batean. Azken urteetan jaso duten lan kopurua "nabarmen egin du behera" eta antolatzaileen hitzetan "testuinguruak" ez du ahalbidetzen sariketa egitea.
Arrazoi horiek direla eta erabaki dute sariketa etetea, eta hurrengo ikasturteari begira, euskarazko zientzia-dibulgazio lanei ikusgarritasuna emateko moduen inguruan hausnartuko dute. Modu berean, aurtengo partehartzaileei barkamena eskatu eta eskerrak eman dizkiete.