Buren jarraitzen du zabortegi nuklearraren aurkako erresistentziak: berriro basoa okupatzen saiatu dira

  • Larunbatean, martxoak 3, Bure herrian (Meuse departamendua, Frantzian) 300 ekintzaile ahalegindu dira bertan gobernuak hondakin nuklearrentzako eraiki nahi duen biltegi erraldoiaren aurka kanpaleku berri bat eraikitzen. Ingurueak gau eta egun zaintzen dituen polizia talde oso handi batek eragotzi die. Hala ere, mugimendua zabaltzen ari da Frantziako estatuko beste herri eta eskualde askotara.

Pello Zubiria Kamino @pellozubiria
2018ko martxoaren 05a
300 ekintzaile saiatu dira Bureko oihanera iristen, 500 poliziari aurre eginez. (Argazkia: La Croix)

Joan den otsailaren 22an poliziek –ARGIAn Maddi Txintxurretak ezagutarazi bezala– sakabanatu zituzten Lejuc oihana okupatzen zuten militanteak, Bure bera estu kontrolatuz hortik aurrerako egun guztietan. Joan den larunbatean zientoka ekintzailek aurre egin diete inguruetan manifestaziorik eta ezta bilerarik ere egiteko debekuei eta berriro saiatu dira basoan sartzen, bertan kokatzeko behatoki permanente bat. Ez dute lortu, lekuan ziren kazetarien kalkuluetan 500 ziren polizien presentzia itogarriagatik.

Bure herria otsailetik gaur eta egun harturik daukate poliziek. (Argazkia: @ZIRADies, Twitterrez)

Zabor nuklearrez okupatzen den ADRA agentzia publikoak Buren eraiki nahi du Cigeo Bury biltegi erraldoia, gehiena lurpean joango dena baina Lejuc basoan eduki behar lituzkeena kanporako tximiniak. Hortxe zentratu dute beren ekintza ekintzaile antinuklearrek. Energia atomikoan Europako potentzia nagusi den Frantziak arazo larri bat dauka hondakin erradioaktiboekin eta horien orain lurpeko sarkofago erraldoi batean utzi nahi ditu pilaturik, jakinda milaka urtez arriskutsuak izanen direla.

Ingurumen arloan Europak bizi dituen gatazken artean nagusietakoa bilakatu da  Burekoa. Paradoxikoki, Emmanuel Macron presidenteak Ingurumen ministro izendatu duen Nicolas Hulot ekologista famatuaren agintaritzapean. Jendarmeekiko talkari umore pittin bat ezarri nahian, ministroaren abizenarekin jolas eginez –hulotte frantsesez urubia da, mozoloa– manifestari askok aurpegiak estaltzen zituzten hontz itxurako maskarekin. Horien artean poliziek lau zauritu dituzte eta zortzi gehiago atxilotu.

Reporterre hedabidean kronika mamitsuaz gain argazki eta bideo adierazgarriak bildu ditu Herve Kempf zuzendariak berak:

 

Kanal honetan artxibatua: Hondakin nuklearrak

Hondakin nuklearrak kanaletik interesatuko zaizu...
2017-08-30 | Arabako Alea
Kutsadura aztarna berriak azaldu dira Garo˝an

Orain arte inon jasota ez zegoen isurketa baten arrastoa antzeman dute oraingoan. Maiatzean, berriz, su-itzalgailu bat erabili behar izan zuten sugarrak amatatzeko.


Uranioak pozoitu ditu Bretainiako lurrak

Hogeita hiru urte dira azken uranio meatzea ustiatzeari utzi ziotela Bretainian, baina pozoiak ez du, itxuraz, ondorengo milaka urtetan lur horietatik mugitzeko asmorik. Reporterre.net-en argitaratu berri dute aferari buruzko erreportajea.


Azkenak
EGILEA
Eguneraketa berriak daude