Dilma Rousseffen kaleratzea kromo aldaketa bat baino zerbait gehiago da. Libre Red-ek argitara emandakoaren arabera, Rousseff ordezkatu duen Michel Temerren PMBDk (Brasilgo Mugimendu Demokratikoaren Alderdia) haratago joan nahi du, erreforma garrantzitsua eginez.

Aldaketa nabarmenenak arlo ekonomikoan gauzatzea aurreikusten da. Besteak beste, murrizketak egin eta inbertsioak esku pribatuetan utzi nahi izatea leporatzen diote Temerri bere aurkakoek. Maiatzean publiko egindako Travesia Social dokumentua jarri dute adibide: PMBDk azpiegituren alorra ahal den neurrian esku pribatuetan uzteko asmoa duela salatu dute.

Egunotan Txinan da Temer, G20aren bileran. Libre Red-en arabera, handik itzultzerakoan egingo dituzte publiko neurri berriak. Hasiera batean, Florianopolis, Porto Alegre, Salvador eta Fortalezako aireportuak esku pribatuetan utziko lituzteke. Etorkizunean Congonhas (Sao Paulo) eta Santos Dumont (Rio de Janeiro) aireportuak pribatizatu asmo dituzte. Herrialde barruko hegaldi gehien jasotzen dituztenak dira.

Denboran aurrera, pribatizazioak portuetan, errepideetan, trenbideetan eta argi nahiz ur horniketetan egitea espero da. Oraingoz, baina, ez da Petrobras pribatizatzea aurreikusten: estatuaren petrolio ekoiztetxea herrialdeko enpresa handienetakoa da. Alabaina, Temerrek Kongresuan dituen aliatuek lege proiektua bultzatu dute, estatuak Petrobrasekiko duen boterea murriztea ahalbidetuko duena.