“Poza bai, baina ez erabatekoa: zaborra biltzeko sistema honen balioa frogatzeko dagoelako, eta hondakinen kudeaketaren arazoa ez delako konpontzen soilik beste edukiontzi bat gehiago jarrita kaleetan”. Horiek dira erakundearen arrazoiak udalaren erabakiarekin erabat ados ez egoteko. Hartutako neurriaz gain, beste bide batzuk ere jorratu beharrekoak baitira haien ustetan. Erakundeen laguntza zerga-onuren bidez, etengabeko sentsibilizazioa eta bildutako materia organikoa malgutzea, besteak beste. Neurriok hartu ezean, Udalak eginiko urratsa “alferrikakoa” izan daitekeela adierazi dute eta “formalismo” hutsean gera litekeela.

Ñabardurak albo batean utzita, urteetako lanaren fruitua dela azpimarratu dute ekologistek.  Hondakin organikoaren auziari “aspaldi” heldu behar zitzaiola esan dute eta neurriak lehenago hartu izan balira, Zabalgarbiko erraustegia ez litzatekeela beharrezkoa adierazi dute. 2012an, Deustun jarritako esperientzi pilotuak emaitza onak eman zituen eta orduan iragarri zuen Udalak hiri osoan jarriko zutela 5. edukiontzia.  Aldiz, sei urte beranduago iritsi da behin betiko erabakia.

Birziklatzea helburua

Bizkaiko materia organikoaren bilketaren tasa %1,4koa izan zen duela bi urte. Ekologistak Martxanek nabarmendu du “asko dagoela” egiteko, Pigruben tasa “egokia” %4,5 baita. “Gipuzkoak Bizkaiak baino zortzi aldiz gehiago jasotzen du bio-hondakina, Bizkaiako biztanleria bikoitza bada ere”. Birziklatzea “ohitura” bilakatu dadin, Udalen eta Aldundiaren erabateko konpromisoa eskatu du erakunde ekologistak.