Bizkaiko autobus bidezko garraio publikoan eragin handia izan du asteazken honetan sindikatuek Bizkaibuseko langileen artean deituriko 24 orduko grebak. Zehazki, lau emakida-zerbitzutan zegoen lanuztea deituta: Ezkerraldean eta Meatzaldean, Txorierrin, Enkarterrietan, eta Busturialdean eta Lea Artibaien. EMB, BLB, CCOO eta ELA sindikatuen esanetan jarraipena "erabatekoa" edo "100%ekoa" izan da zerbitzu horietan.

Grebak bat egin du Bilboko Santo Tomas egunaren ospakizunekin, baita Gabonetako oporraldian milaka jenderen joan-etorriekin, eta horrek protestaren indarra biderkatu du: "Ez dugu beste biderik", azaldu dute.

Lan hitzarmen "justua" eta lan baldintza duinak eskatzen dituzte Bizkaibuseko langileek, soilik horrela lortuko baita, euren esanetan, "kalitatezko zerbitzu publiko bat" ere. Durangaldeko emakidunak hitzarmena sinaturik dauka KPI igoerarekin, eta UGT sindikatuko Óscar Lópezen esanetan, gainerako zerbitzuak horixe bera ari dira eskatzen.

Eguerdian 600 langile baino gehiago elkartu dira Bilbon manifestazioan, euren aldarrikapenak kalera ateratzeko.