"Zigorrik gabeko kondena" eskatu du prokuradoreak Jon Palaisentzat
Urtarrilaren 9an epaitu zuten Palais eta hilaren 23an emango dute ebazpenaren berri. BNP bankuak Parisen duen egoitzatik aulkiak lapurtzea leporatzen diote Palaisi, zerga ihesa eta banku handien inplikazioren aurkako ekintza batean. Epaiketan bere gain hartu zuen ekintza. Halere, "konfiantzaz" irten zen epaitegitik, prokuradoreak "zigorrik gabeko kondena" eskatu baitzuen beretzat. Egun osoan zehar ekintza desberdinak antolatu ziren eta pertsonaia ezagun ugari bildu ziren elkartasuna adierazteko. Beretzat bost urteko espetxea eta 75.000 euroko zigor eskaera dago.
Auzitegira EELVko europarlamentari Eva Joly eta Caroline Joly abokatuekin sartu zen, bere defentsan aritu zirenak. BNP bankuak, bestalde, ez zuen abokaturik aurkeztu eta auzitegiari jakinarazi zion kalte ordain moral gisa euro bat ordaintzeko eskatzen diola Palaisi. Gustora irten arren, kondena arriskua oraindik ere badagoela gogorarazi du.
Bankuek zerga ihesean izan duten papera publiko egitearekin, 2015eko azaroan, Bizi! mugimenduko kideak HSBC bankuak Baionan duen egoitzan sartu eta bertako zortzi ahulki eraman zituzten. Poliziak hainbat berreskuratu zituen mugimenduaren egoitzan, baina beste hainbat ez zeuden bertan jada. Mugimenduko kideek bankuak zor duen dirua itzultzean aulkiak bueltan eramango dituztela agindu zuten. Ondoren, era honetako ekintzak areagotu ziren eta horietako batengatik epaitu dute Palais.
Ekintzailearen esanetan zerga ihesa ez da enpresa eta fortuna handien kontua: “Bankuek antolatzen dute zerga iheserako sistema osoa”. Zerga ihesak Frantziako estatuari 60-80 milioi euroko galerak eragiten dizkio, “horrekin zerbitzu publiko guztiak diruzta genitzake”, adierazi du.
Antoine Peillon kazetaria lekuko gisa agertu zen epailearen aurrean. Peillonen ustez Frantzian dauden ate birakariak dira zerga ihesaren arrazoi nagusi: “Kontrolatu behar dutenen eta kontrolatuak izan behar direnen artean lotura oso estuak daude”. Vincent Drezet finantza publikoetako Solidaires sindikatuko idazkari nagusiak ere lekuko gisa deklaratu zuen.
Zerga ihesari auzia
Iritzi publikoak zerga ihesaren auzia oraindik ez duela bere gain hartu uste du Palaisek. Horregatik, Bizi mugimenduak “zerga ihesari auzi egiteko” baliatu zuen epaiketa.
Egun osoko egitaraua antolatu zuten. Goizean presidentetzarako hainbat hautagairekin bildu ostean, elkarretaratzea egin zuten auzitegi aurrean. Ondoren, manifestazioa hirian barrena musika taldeen laguntzaz. Arratsaldean zehar, auziaren bilakaera aztertu zuten alor ugaritako pertsona ezagunekin. Parte hartzaileen artean José Bové europarlamentaria, Edgar Morin filosofoa edo Jean-François Julliard Frantziako Greenpeaceko idazkari nagusia izan ziren.
Bideo honen bidez azaldu ditu Palaisek eginiko ekintzen arrazoiak:
Frantziako Ingurumen Kodearen L228-2 artikuluak dio hiribideen berritze orok bizikletaz ibiltzeko antolaketak barnebildu behar dituela. Betebehar hori betetzen ez duten Herriko Etxeak identifikatzeko deia luzatu die Bizi talde ekologistak herritarrei.
Metamorfosia ekologiko eta soziala bultzatzen duten alternatiben erakusleiho bat Baionan. Euskal Herria "burujabe, solidario eta iraunkorraren" aldeko ekimena ospatu du Bizi mugimendu ekologistak asteburuan, Lapurdiko hiriburuan. Parte hartze kopuruak antolatzaileek... [+]
Euskal Herria Burujabe "festa herrikoi eta ekintzailea" antolatzen ibili da Bizi! mugimendu ekologista, lurralde "jasangarri, solidario eta burujabea" osatzen duten alternatiben ezagutzeko asmoz.
2013ko Alternatiba Egunetik hamar urtera, 10.000 pertsona bildu nahi ditu Bizi mugimendu ekologistak bi egunez Baionan. ‘Euskal Herria Burujabe’ topaketak antolatu ditu urriaren 7tik 8ra, lurralde iraunkor, solidario eta burujabe baten aldarrikatzeko.