“Legealdiaren bukaeran” eta “ia garaiz kanpo” bada ere, Gipuzkoako Foru Aldundiak Bioaniztasunaren Kontseilua sortu izanagatik pozik azaldu dira herrialdeko hamasei talde kontserbazionista eta ekologista, hedabideei igorritako gutun batean.
Biodibertsitatearen alorreko adituak eta administrazioko eta jendarteko eragileak bilduko ditu organo sortu berriak. Eskutitza sinatu dutenen esanetan, Natura 2000 Sarea –“Europar Batasunak natura babesteko garatu duen erremintarik eraginkorrena”– tokian-tokian behar bezala garatzeko ezinbestekoa izango da, hain zuzen, ingurune naturalaz adituak direnen iritziak eta ezagutzak kontuan hartzea.
Orain arte oso bestela jokatu du Gipuzkoako Aldundiak, natur taldeen esanetan. Izan ere, erabakiak hartzeko organoak zenbait lobbyren mesederako (egurzaleak, ehiztariak…) egituratu izana leporatu diote Aldundiari.
Mendiak eta Natura Ingurunea saileko zuzendaritzak, sustatutako politiken bitartez, ondare publikotik irabazi pribatuak lortzea lehenetsi duela adierazi dute kontserbazionistek. “Horretan onuradun izan diren enpresek eta banakoek gogor egi(te)n diote politika horiek aldatzeko ekimenei”, gaineratu dute.
Aipatutako lobbyen artean batez ere egurraren sektoreko enpresak nabarmentzen direla uste dute sinatzaileek, baina EHNE eta ENBA sindikatuen jarrera kritikatu dute halaber. “Lehen sektorea nola dagoen ikusita, politika horietan aldaketak eskatzen ditugunon artean aliatuak bilatzeko ahalegina egin beharko luketelakoan gaude”.
Bukatzeko, Bioaniztasunaren Kontseilu sortu berria benetan eraginkorra izan dadin konpromisoa eskatu diete alderi politiko guztiei, hauteskunde kanpaina hastear dagoen honetan.
Natur taldeen eskutitza osorik hemen