Kanaria uharteetako kostaldera iritsi nahian ari ziren, baina Mauritanian urperatu zen ontzia. Desagerturik jarraitzen dute 100 pertsonak baino gehiagok.
Beste sarraski bat izan da itsasoko migrazio-bidean. Kanaria uharteetara heldu nahian ari zen ontzi bat hondoratu egin da Mauritaniako uretan, hondamendi ikaragarria eraginez. Mauritaniako agintaritzek baieztatu dutenez, 49 pertsona hilik aurkitu dituzte jada, eta desagertu egin dira gainerako guztiak. 100 bat dira desagertuak, ontzian 160 lagun inguru zihoazen eta.
Alemaniako DPA agentziak jaso duenez, Gambiatik irten zen ontzia, eta astearte gauean urperatu zen, Nuakchoteko kostaldetik gertu. Badirudi Gambiakoak eta Senegalekoak zirela bertan zihoazen pertsonak. Espainiako Estatuko kostara iristea zuten helburu.
Atlantikokoa da Europara joateko migrazio-biderik arriskutsuenetako bat. Migrazioetarako Nazioarteko Erakundearen (OIM) arabera, 2014tik hona, 5.500 bat lagun hil edo desagertu dira bide horretan. 2024an, denera, egunean bederatzi pertsonak galdu zuten bizia Europako kostaldera migratu nahian, batez beste. Heriotzen eta desagerpenen %44, gainera, Espainiako Estatura iristeko saiakeran gertatu ziren.