Abuztuaren 20an, Iberdrolaren akzioak %1,28 garestitu ziren Burtsan: 16,58 euroko balioa izatera heldu zen akzio bakoitza (3,50 euroko prezioa zuen 2001ean). Horrekin, orain arteko errekor guztiak hautsi ditu enpresa energetikoaren kapitalizazioak, 110.775 milioi euroko balorizaziora iritsiz. Zifra horietara iristen den lehen aldia da bere historian.

Iberdrola Europako energia-enpresarik handiena da dagoeneko, baita mundu-mailako bi handienetako bat ere. Urtea hasi zenetik, %30 egin du gora bere balorizazioan. Hala, 2024an 5.612 milioi euroko irabazi errekorrak lortu ostean, bide beretik doa aurten ere: aurreikuspenak gainditu eta inoizko irabazirik handienak lortzeko bidean da 2025ean, urteko lehen seihilekoko emaitzek iradokitzen dutenez. Izan ere, aurtengo lehen sei hilabeteetan, 3.562 milioi euro irabazi ditu, iazko epe berdinean baino %20 gehiago.

Datorren irailean, enpresako buruek Capital Markets Day jardunaldia egingo dute Londresen, hurrengo pausoen inguruan hitz egiteko. 5.000 euroko igoera bat iragarri dute konpainiaren kapitalean, Amerikako Estatu Batuetan eta Erresuma Batuan sareen negozioa handitzen eta aberasten jarraitu ahal izateko. Horrez gain, badirudi Mexikon dituen negozioak salduko dituela.