2015ean jo zuen goia EAEn Diru-Sarrerak Bermatzeko Errenta jasotzen dutenen kopuruak (66.373 lagunek behar zuten orduan). Ordutik, beherantz egin du kopuru horrek eta uztailean ere hala izan da: 57.377 izan dira DSBE jaso duten pertsonak, 2012 urteko kopurua berdinduz.
Epe laburrean, prestazio sozial hau eztabaidatzea mahai gainean du Eusko Legebiltzarrak. Gogoan izan behar dugu hainbat aldaketa jasan dituela urteotan, besteak beste prestazioaren beharra dutenek diru gutxiago jasotzen dute 2011tik, eta berau jasotzeko baldintzak gogortu dituzte: erkidegoan gutxienez hiru urtez erroldatuta egon behar du eskatzaileak.
Profila ez da aldatu
Diru honen premia dutenen profila ez da aldatu. Gehienak langile pobreak dira; alegia, lan egiten dute, baina hain gutxi irabazten dute, prestazioa behar dutela diru-sarrera duin bat osatzeko. Gehienek oinarrizko ikasketak dituzte, Espainiako Estatuan jaioak dira, 35-54 urte artean dituzte eta emakumeak dira (emakumeen artean, azpimarratzekoa da asko direla diru gutxi jasotzen dutelako prestazio honen beharra duten alargunak).