Juan Carlos Campo epaileak dio non bis in idem printzipioa urratuko lukeela errepikapenak, berri agentziek aurreratu dutenaren arabera. Zirriborroa hurrengo asteko osoko bilkuran eztabaidatuko du Konstituzionalak, eta ‘gehiengo aurrerakoi’ari esker onartzea espero da.
2021eko urrian Arnaldo Otegi, Arkaitz Rodríguez, Sonia Jacinto, Miren Zabaleta eta Rafa Díezen defentsak jarritako helegiteari erantzunez eman behar du epaia Konstituzionalak. Efe eta Europa Press agentziek aurreratu dute Jaun Carlos Campo epailearen epai zirriborroaren edukia. Agentzien arabera, hainbat arrazoi eman ditu epaileak epaiketa ez errepikatzeko. Batetik, Estrasburgoko Giza Eskubideen Europako Auzitegiak, ebatzi zuenean zigortuek ez zutela epaiketa justua izan, zehaztu zuen auziaren errepikapena akusatuek soilik eskatu zezaketela. Bestetik, errepikatzeak non bis in idem (ezin da pertsona bat gertaera beragatik bi aldiz epaitu) printzipio juridikoa urratuko luke. Azkenik, akusatuek osorik bete zuten Espainiako Epaitegi Gorenak ezarritako zigorra.
Hurrengo astean bilduko da Konstituzionalaren osoko bilkura, eta betei ere berri agentzien arabera, litekeena da zirriborroa onartua izatea ‘gehiengo aurrerakoi'aren babesari esker.
Hamalau urte luzeko sufrikarioa
Bateragune auziaren jatorria 2009ko urrian dago, Espainiako Poliziak Rufi Etxeberria, Txelui Moreno, Amaia Esnal, Mañel Serra, Ainara Oiz, Sonia Jacinto, Arkaitz Rodríguez, Miren Zabaleta, Arnaldo Otegi eta Rafa Díez atxilotu zituenean. Azken bostak espetxeratu zituen Baltasar garzón epaileak. 2011n espetxe zigorra ezarri zien Espainiako Auzitegi Nazionalak Sonia Jacinto, Arkaitz Rodríguez, Miren Zabaleta, Arnaldo Otegi eta Rafa Díezi, ETAren estrategiaren barruan Batasuna berreraikitzen saiatzea leporatuta. Gainontzeko akusatuak errugabe jo zituen. 2012an Gorenak zigorra berretsi zuen. 2018an Estrasburgok, akusatuen helegiteari erantzunez, ebatzi zuen epaiketa ez zela justua izan. Ordurako akusatu guztiak kalean zeuden, zigorra osorik beteta. 2020an Gorenak aho batez erabaki zuen epaiketa errepikatzea, fiskaltzaren aldeko jarrerarekin. Defentsak babes helegitea aurkeztu zuen Konstituzionalean, eta honek erabaki zuen helegitea aztertu bitartean epaiketa ez errepikatzea. Ematen duenez, hurrengo astean emango du epaia Konstituzionalak.