Aurtengoa seigarrena duen edizio honek, hartuko dituen espazioak izango ditu bereizgarri, ohiko elizez eta antzokiez gainera, okindegi, karrika, eskola edo auzotara ere eramango baitira ikuskizunak, eguneroko bizitzan txertatzearren.

Beñat Achiary musikari eta antolatzaileak adierazi zuenez, "Édouard Glissant, Jean Jaurès, Etxahun eta Mikel Laboa bezalako artistek inspiraturiko sorkuntzak, Zuberoako kantu herrikoiak eta mundu osokoak, jazza edo inprobitsazioa proposatzen ditugu, magiaz beteriko egun hauek alaitasunean eta sutsuki bizitzeko”.

Larunbata arte luzatuko den erakusketak emango dio hasiera jaialdiari. Bonnat Laukia izango du gune nagusia baina Second Jeudi galeria, Levant edo Rue en Pente liburudendetan ere ikusi ahal izango dira lanak. Erakusketarekin batera, dantzak, kantaldiak eta bestelakoak antolatuko dira tartean. Adibidez, ostegunean, Beñat Achiaryk eta Mizel Theretk Xoriek ikuskizuna onduko dute Mikel Laboaren omenez.

Baiona munduko kale leloarekin bat eginez, hirietan harmonian bizitzeko moduez egingo dute gogoeta artistek, Baiona iparraldeko Breuer eraikinaren inguruan.

Ekainaren 29an, berriz, Itxaro Bordak idatziriko Gerezien denbora pastoral hiritarra eskainiko da Baionako portuan.