Hamabi herritan izanen dira aurtengo azoka ekologikoak. “Eskaintza ez da soilik postuetan bukatzen: aurten, hainbat herritan sukaldaritza saioak, dastaketak eta elikagai ekologikoen inguruko errezetak egingo ditugu”, adierazi dute prentsa oharrean. Izan ere, erosketa poltsa betetzeko aukera emateaz gain, ekoizleen eta kontsumitzaileen arteko topaleku izatea da egitasmoaren helburua, baita ekoizle txikien lana ikusaraztea eta elikadura burujabetzarako bidean zuzeneko salmenta aldarrikatzea ere.

Aipatu bezala, Kontseiluaz gain herrialde bakoitzeko elkarteak ari dira lanean, eta tokian tokiko udalek eta kontsumo taldeek parte hartuko dute haien herrietako azoken antolaketan. Abuztuaren 2an izanen da lehenbizikoa, Zigoitian, eta urriaren 11n azkenekoa, Eibarren. Koadroan daude ikusgai azoka guztien datak.

Nekazaritza ekologikoa, pixkanaka hazten

Kontseilutik jakinarazi dutenez, 2024an %18 hazi da ziurtatutako azalera ekologikoa EAEn eta 12.689 hektareara iritsi dira. Igoerarik handiena Gipuzkoan izan da, nahiz eta oraindik ere Araba den ekologikoan azalera gehien duen herrialdea. Dena den, prentsa oharrean gogorarazi dute Europar Batasunak 2030erako ezarritako helburuetatik urrun daudela. Izan ere, urte horretarako nekazaritza lurren %25 baino gehiago eredu ekologikoan lantzea da erronka, eta gaurko portzentajea %6,7 da. Erronka horiei aurre egiteko, baina, ezinbestekoa da ekoizpenean ez ezik, kontsumoan ere eraldaketa handiak bultzatzea. “Egunero egiten dugun erosketa bakoitza aukera da ingurumena zaintzeko eta landa-eremuaren eta gure ekoizleen alde egiteko”, gogorarazi dute.