Instituzioen diru-laguntzarik gabe eta auzokideen ekarpenekin antolatzen dira urtez urte Zaharraz Harro! jaiak. Aurten, antolakuntzatik azaldu dutenez, 140tik gora dira komertzio eta taberna laguntzaileak, 53 jardueraren bat antolatu duten elkarte, kolektibo eta espazioak, eta horrela osatu dute aniztasun handiko programazioa, adin eta auzokide guztientzako 80 jarduera baino gehiagorekin: mobilizazioak, auzolanak, kontzertuak, tailerrak, hitzaldiak, zinema, kirola... Formatu ertain edo txikiko jarduerak denak, auzotik auzoari begira antolatuak.

Horietatik guztietatik gutxi batzuk soilik antolatzen ditu Zaharraz Harro!ren asanbladak, eta horietan parte hartzeko gonbita azpimarratu dute: Astelehenean, jaiei hasiera ofiziala ematen dien txupinazoa; ostegunena Auzolana frontoi okupatuan konponketa lanak egiteko auzolana,; eta larunbateko egun handian, ginkana aldarrikatzailea goizean, bazkari autogestionatua eguerdian, eta gaztetxeko guatekea gauean. Hemen sakatuta kontsultatu daiteke egitaraua egunez egun.

Jaia eta iraultza

Jaitik iraultzara pausu bat bakarrik delako: Egin bide, auzokide! ¡Turista, coge pista!, da jaien aurtengo leloa. Horrela azaldu dute: “Poliziaren presentzia, pisu turistikoen gorakada eta etxebizitzen alokairuaren garestitzeak, besteak beste, auzoan bizitzea zailago bilakatzen dute eta horregatik kalera irten eta elkartzen garenean, ezinbestekoa da gure ardura, haserre, amorru eta borrokak partekatzea. Jaiak ere, kontzientzia astindu eta auzoa eraldatzeko esparru gisa ulertzen ditugulako, jaitik iraultzara pausu bat bakarrik delako: egin bide, auzokide! ¡Turista, coge pista!”.