Argi dago gailu mugikorrak gero eta gehiago erabiltzen direla eta dirutza itzelak mugitzen direla sektore horren inguruan. Baina gure inguruko kontsumo ezaugarrien daturik ez daukagu, edo nik behintzat ez ditut ezagutzen: Euskaldunak edo euskal herritarrak zertarako erabiltzen du mugikorra? Hitz egiteko? Jolasteko? Eguneko albisteak jasotzeko? Informazio praktikoa kontsultatzeko…?

Ez zait iruditzen albisteak mugikorretatik asko irakurriko direnik, informazio praktikoaren kontsultari zentzu gehiago ikusten diot: zer tren har dezaket orain Donostiara joateko? Zer film ikusiko dut?… Are gehiago ekintza zehatzetarako;  sarrerak erosteko, adibidez.

Edozein modutara, galdera bat egin nahiko nieke gure irakurleei: ARGIAko edukiak zuen mugikorretan jasotzerik nahiko al zenukete? Zein eduki? Eta zer erabilera ikusten diozue?

Bide batez, ea Eustat edo antzerako erakunderen batek gorago aipatutako datuak ezagutzeko azterketarik egiten duen.

Eta orain agindutako hamaika ondorioak:

• Mugikorretara egokitutako nabigatzailerik onenetakoa Opera da (edozein webgune nabigatzaile hau daraman mugikor batean nola ikusiko den ere froga daiteke).
• Mugikorrek erabiltzen dituzten sistema eragileek ordenagailuek duela hiru urte zituzten ezaugarriak dituzte.
• Diseinuak sinplea izan behar du, lehen pantailak webean baino garrantzi gehiago dauka.
• Menuaz gain, bilatzaileak berebiziko garrantzia dauka, mugikor batean ezin baitugu orrialde normal batean bezala nabigatu edukiak aurkitzeko.
• Mugikorrak ez daude oso prestatuak flash irakurtzeko
• Tekla bidezko (acceskey) nabigazioa ezartzen badugu (praktika ona) sarritan ez dabil, mugikorren fabrikatzaile gehienek tekla horiei beste funtzio batzuk egokitu baitizkiete.
• Orri bakoitzeko gehienez hamar esteka eman behar dira eta ez dira bost maila baino gehiago hierarkizatu behar eduki bat topatzeko.
• Telefono zenbakietan klik egin eta mugikorra zuzenean deika has dadin nahikoa da kode hau ezartzea: <a href=tel:943371545>943 37 15 45</a>
• Mikroformatuen bidez gure mugikorreko agendara helbide eta telefonoak modu errazean deskargatzeko aukera dago. Informazio gehiagorako: microformats.org/code/hcard/creator
• Jartzen dugun informazioak praktikoa izan behar du.
• Gure edukiak mugikorrerako prestatu nahi baditugu, lau aukera ditugu, merkeenetik garestienera sailkatuta:

1. Ezer ez egin: webgune osoa nabigatzaileari txikitzen utzi.
2. Formatua kendu, nabigatzaileek webgunea modu sinpleagoan erakutsi dezaten.
3. CSSetan oinarritutako diseinua egin: CSS estilo bat webgune normalarentzat eta beste bat mugikorretarako.
4. Web mugikorra sortu: Mugikorretarako egokitutako aplikazioa izango dela hasieratik pentsatu.