Fiskaltzak Santos Cerdán PSOEko antolakuntza idazkari ohi nafarra espetxera behin-behinean bidali eta astebetera, Servinabar Nafarroako enpresako jabe Antxon Alonsok deklaratu du astelehen goizean Espainiako Auzitegi Goreneko epaile Leopoldo Puenteren aurrean. Ordubete inguru iraun du deklarazioak, eta Guardia Zibilaren UCO atalak haren etxean aurkitutako kontratu baten inguruan galdetu dio epaileak, kontratu horren arabera Servinabarren %45a 6.000 euroren truke erosi baitzuen Cerdanek.

Alonsok, Cerdanek duela astebete egin bezala, ukatu egin du hori, eta adierazi du PSOEko antolakuntza idazkari ohia politika uztekotan zegoenean adostu zutela biek kontratu hori; baina, politikan jarraitzea erabakia zuenean, kontratu hori haustea adostu omen zuten biek. Alonsok ez zuen hori egin, ordea, eta kontratu hori haren etxearen miaketa egitean aurkitu zuen Guardia Zibilaren UCO atalak, Cerdan "Koldo auzian" inplikatuko lukeen froga izanik. Gainera, Alonsok epaileari esan dio agiri horrek ez duela balio, adostu zuten garaien ez baitzuten publiko egin notarioarenera eramanda.

Dena dela, Gorenak ustelkeriaren aurkako fiskaltzaren eskaera onartu du: ezingo du Espainiako Estatutik irten Alonsok, momentuz. 

Nafarroako Gobernuko eraikuntza obren adjudikazioetatik azken urteetan 80 milioi eurotik gora lortu ditu kontratuetan Servinabar enpresak, Accionarekin akordioa egin ondoren. Hain zuzen, Accionako kontseilari Fernando Merinok ere deklaratu du epailearen aurrean, eta esan du adjudikazio horiek lortzeko "ezinbestekoa" zela Servinabarrekin batera lanean aritzea. Halere, Alonsok eta Merinok ukatu egin dute obren adjudikazio horiek "legez kontrako komisioak" ematearen bidez lortu zituztela.

Otegik aitortu du bi aldiz bildu zela Alonsorekin, baina ez dutela "ezkutatzeko ezer"

Cerdanen aurkako auzian Antxon Alonsoren izena ageri eta berehala, haren herri berekoa den Arnaldo Otegi EH Bildu koalizio abertzaleko idazkari nagusiarekin lotu zuten hainbat hedabidek. Nagusiki Cerdanekin harremana zuelako Otegik, baina bestalde, Alonso eta Otegi elgoibartarrak direlako. Ostegunean eginiko prentsaurrekoan Otegik aitortu zuen bi aldiz bildu zela Alonsorekin, eta honek Cerdanekin biltzeko bitartekari gisa jardun zuela. Cerdanekin bildu zenean, ordea, soilik EH Bildu eta PSOEren arteko komunikazio sareak sendotzeaz hitz egin zutela adierazi zuen EH Bilduko idazkari nagusiak, eta koalizioak ez duela "ezkutatzeko ezer".