Ander Rodriguez, Pello Urizarren ordezkari Eusko Legebiltzarrean
Pello Urizarrek ekainean eman zuen dimisioa, EA alderdiko idazkari nagusi gisa lehenik, eta legebiltzarkide modura ondoren. Ander Rodriguezek beteko du honen tokia, Gipuzkoako Diputazioan Gizarte Politiketako arduraduna izandakoak.
Ander Rodriguez (Argazkia: Alternatiba)
Arrasatearra da Ander Rodriguez (1982), eta udalerrian hasi zuen politika alorrean ibilbidea. 2003an zinegotzi gisa estreinatu zen, eta 2015era arte jardun zuen herritarren ordezkari lanetan: Ezker Batuan hasieran, Alternatiban ostean eta Bildun eta EH Bildun gerora.
2007-2011 eta 2017-2019 epe tarteetan izan da batzar nagusietako kide. Bildu Gipuzkoako Batzar Nagusietako 2011ko hauteskundeetan garaile atera zenean, Gizarte Politiketako ahaldun izendatu zuten eta legegintzaldi bat eman zuen kargu horretan.