Amurrioko Correos enpresa publikoko banatzaileek greba egin zuten ostiralean ere eta horrela jarraitzeko asmoa daukate astelehenean. Hala adierazi diote Aiaraldea Komunikabideari, konpainiako zuzendaritzaren proposamena ez baita egokia, euren ustez.

CCOOk aipatu dio komunikabideari Correoseko ordezkariek iradoki dietela Amurrioko lanpostuen birdimentsionatzea aztertuko dutela eta langile bat gehiago kontratzea.

Edonola ere, sindikatuaren aburuz, hori ez da konponbidea, besteak beste, kontratazio hori lan hitzarmenetik kanpo egingo luketelako eta oraindik beste lanpostu bat bete gabe geratuko litzaketelako.

Berez, postariek hiru eguneko greba abiatu zuten ostegunean hiru beharginetatik bi falta direlako eta uda heltzear dagoelako. Orain arteko gainkarga biderkatuko dela aurreikusi dute eta jadanik egoera prekarioa dela salatu dute.