Jeremy Corbyn bizirik aterako ote da Alderdi Laboristaren eskuinak antolatutako kolpetik?
Britainia Handiko politikarien eremuan eskuinetik bultzatu bazen Europar Batasunetik irteteko erreferenduma, emaitzak kalterik handiena ezkerrean eragin du orain artean. Alderdi Laboristaren kide neoliberalenek, Tony Blair eta Gordon Brownen ildoan hautatutako parlamentariak buru, estatu kolpea antolatu diote biharamunean bertan Jeremy Corbyni, azken kongresuan botoen %60rekin irabazi zuen lider zahar bezain berriari.
Brexitaren biharamunetik, aurrez ondo prestatutako partitura joaz bezala, Corbynen itzaleko gobernuko –oposizioak horrela funtzionatzen du Londresen– kideen erdiak baino gehiagok banan bana eman diote dimisioa, errenuntziazko gutun gordinak Interneten eskegiz, eta horren ostean parlamentari laboristek konfiantzazko bozkaketa ezarri diote liderrari. Corbynek lehendik ez zeukan konfiantza berriro galdu du, noski: laboristen azken kongresua aurretik hautatuta zetozen parlamentari gehienen iritziaren kontra irabazi zuen lider ezkertiar zaharrak. Astearte arratsaldean "Corbynek galdu du laborismoaren konfiantza" titulatu zen Interneten, ondoren ezagutu zen Corbynek dimititu ez baina aurrera tinko segitzeko daukan erabakiaren berri... eta asteazken goizeko paperetan ageri zen errealitatea pittin bat konplexuagoa dela. Zenbateraino konplexua?
Michael Chessumek idatzi du The New Statesmanen: "Corbynek petto bakarra egin du: estuago lotu behar zuen Alderdi Laborista". Eta barruan: "Brexita geldiarazteko argudio bakarra zen austeritatea eta neoliberalismoa direla benetan ekarri dituztenak etxerik eza, soldaten jaitsiera eta zerbitzu publikoen hondatzea, ez dela etorkin errumaniarren eta bulgariarren kontua. Corbynen akats nagusia izan da hasieratik zorrotzago ez hartu izana Alderdi Laboristaren kanpainaren kontrola eskuetan, nahiz eta hori egin izan balu ere berdin aurpegiratuko zioten. (...) Laborismoaren eskuinak egoera oso zaila antolatu zuen kanpainan eta orain probetxua atera nahi diote biharamunari. Nahiz eta basati eta axolakabeak izan, zakur jokatu dute".
Oraintxe bertan Alderdi Laboristaren zati handi bat mobilizatuta dago Jeremy Corbynen inguruan, eta aldi berean notable gehienek alde egin diote –Thomas Pikkety orain arte azkena– edo tiroka ari zaizkio kargu publikoetatik. Alderdi Laboristari haize berria ekarri dion Corbynek astearteko deklarazioan adierazi du ez dela etxera joango lanak erdi bidean utzita. Politika pasioz segitzen duen irakurleak orain du apostua egiteko aukera. Egoskorkeria hutsez eutsi dio karguari Corbynek eta laster kanporatuko dute? Ala une historikoaren irakurketa zuzena eginda kontserbadoreek eragindako Brexita ezkerretik kudeatuko duen lider moduan sendotuko da?
Ipar Irlandako Parlamentua blokeatuta dago maiatzetik, DUP unionisten alderdiaren protestagatik, ez baitago ados Brexitaren ostean Ipar Irlandan Europako Batasunak jarri dituen merkataritza kontrolekin, besteak beste. Erresuma Batuaren eta Europako Batasunaren hitzarmen berriak... [+]
Negoziaketa prozesu luzearen ondotik, Erresuma Batuak eta Europako Batasunak Brexit-aren gaineko akordioa lortu dute azken minutuan.
Europako Batasuna 1993an sortu zenetik kide berriak gehitu dira bata bestearen atzetik. Joan den ostiralera arte 28 estatuk osatu dute makro-egitura politiko eta ekonomiko hori. Izan ere, urtarrilaren 31 historiara pasako da, EBk izan duen lehen zatiketaren eguna izan delako... [+]
Otsailaren lehenean bereizi dira Erresuma Batua eta Europar Batasuna.
Brexita gauzatzeko aukera eskura du Lehen Ministro eskuindar Boris Johnsonek, Alderdi Kontserbadoreak gehiengo absolutua lortu ostean. Alderdi Laboristak 85 urtean izan duen emaitzarik eskasena eskuratu du. Eskoziako Alderdi Nazionala da hirugarren indarra Erresuma Batuko... [+]