Goizeko 10etan, Irungo ezker abertzaleak, EAk, Aralarrek eta Alternatibak deituta manifestazioa abiatu da udaletxe aurretik. Jendetsua izan da manifestazioa eta zentroa zeharkatzean sumatu da batez ere, Kolon pasealekua punta batetik bestera hartu baitute manifestariek. “No a las reformas y a las imposiciones. Euskal Herriak burujabetza!” eta “Gazteen gainetik ez zarete pasako. Zerri kapitalistak” lemapean, Hondarribia kalean buelta eman eta Zabaltza plazan bukatu da manifestazioa. Lan erreformaren kontra azaltzeaz gain, bidea independentzia dela aldarrikatu dute antolatzaileek, eta gizarte eredua aldatzearen premiaz ohartarazi dute.

Ondoren, nahiko hutsik geratu dira Irungo kaleak, asko eta asko Donostiako manifestaziora joan dira-eta. Arratsaldean, 16:30ean kotxe-karabana atera da Moskutik, 17:30ean Hondarribian egin da manifestazioa eta azkenik, 19:00etan, Irungo Zabaltza plazatik atera da eskualdeko azken mobilizazioa. "Murrizketa, erreforma eta inposaketari aurre egin" lemapean, goizekoa baino are jendetsuagoa izan da Euskal Herriko gehiengo sindikalak (LAB eta ELA) eta hiriko hainbat gizarte taldek deitutako manifestazioa. Kolon pasealekua zeharkatu eta Hondarribia kalean buelta eman ostean, udaletxean bukatu da arratsaldeko ibilbidea. Azken hitzordu honetan, guztira 3.500 lagun inguru bildu dira lan erreformaren aurka, LAB sindikatuak emandako datuen arabera.