Hasiera batean, Kyotoko Protokoloak aurtengo abenduaren 31ra arte eduki behar zuen iraupena. Haren ondorengo akordioak negutegi-efektu gasen isurpena are gehiago murriztea izan behar luke xede –gogoratu behar da, bestalde, Kyoton ezarritako helburuak ez direla bete–, hala nola ahalik eta herrialde gehien biltzea. Izan ere, 37 herrialde baizik ez daude behartuta, Kyotoren arabera, emisioak murriztera, eta horien artean ez daude ez AEB, ez India, ez Txina, isurpen gehien egiten dituztenetako batzuk aipatzearren. Dagoeneko, helburua ez da klima aldaketa geldiaraztea, ahalik eta leunena izatea baino. Bestela esanda, beroketa globala ez dadila izan 2º-tik gorakoa (zaila izango da 1,5º-en langa ez gainditzea, batzuek itxaropena agertu arren). Alabaina, akordioa lortzea ezinezkoa izan da orain arte; hori dela eta, Kyotoko Protokoloko baldintzak 2015era arte luzatzea erabaki zuten iaz, Durbaneko Aldeen Biltzarrean. Beranduenez urte horretan erdietsi beharko da hitzarmen berria, baina praktikan 2020ra arte berandutu daiteke haren ezarpena.

Kopenhagetik hona hiru urte joan zaizkigu aurrerapausorik gabe, salatzen dute elkarte ekologista askok. Are okerrago: ez dute gauza handirik espero Dohako honetaz. Irailean Bangkoken egin biltzarrean, egunotan eztabaidatuko den txostena prestatzeko bildu ziren nazioarteko ordezkariak, eta argi geratu zen oso gutxi daudela prest beren posizioa aldatzeko. Europar Batasunak, izan ere, uko egin zion urtebete lehenago Durbanen iragarritako konpromisoa eusteari (2020rako %30 murriztu isurpenak). AEB bera ez dago konpromiso bat hartzetik hurbilago orain dela hamar urte baino.

Isurpenak modu nabarmenean gutxitu nahi ez eta, bestelako irtenbideak ere –Greenpeace bezalako elkarteek aspaldi irtenbide faltsu izendatu dituztenak– izango dira mintzagai Qatarreko gailurrean. Karbonoa atzematea eta gordetzea da horietan azpimarragarriena. Hau da, tximinian bertan CO2-a harrapatu eta gordeleku bateraino garraiatu, atmosferara iritsi dadin eragozteko. Hain zuzen Qatar da bide horren alde indar gehien egiten ari den estatuetako bat; ez da ahaztu behar erregai fosilen erreserba handiak dituela emirerriak, eta alde horretatik ez zaiola komeni emisioen murrizketa esanguratsu bat. Bitxia da itsas mailaren igoerak gehien mehatxatutako lurraldeetako bat ere badela Qatar. Baina petrolio-konpainia handietako jabeek goreneko solairuan izaten dituzte bulegoak.