Aurrekoetan industria guneetako aparkalekuak erdi hutsik zeuden, baina horixe, erdi hutsik, zenbait tokitan kotxe dezente ikusten zen. Gainera, lanera erdi ezkutuan joateko bi metodo behintzat somatu nituen: senideak lanera eramandako langile bat baino gehiago topatu nuen, kotxea aparkalekuan ez uzteagatik; eta beste batzuetan kotxeen arrastorik ez, ateak itxita, baina barruan fabrika hotsa.

Gaur kotxe multzo handiak apenas ikusi ditudan. Fabriketako ateak itxita eta zaratarik ez. Tabernak eta dendak ere itxita, Urola bailarako komertzio kaleak hutsik aurkitu ditut, jendea ere apenas kalean. Erdi ezkutuan dagoen taberna bat aurkitu dut irekita, Azkoitiko Txerloia industria gunearen ondoan, terrazan zegoen jendea lasai. Bankuren bat edo beste bai, irekita. Komertzio handiei dagokienez, oker ez banago azkeneko greban Azkoitiko Eroski, Lidl eta Dia irekita egon ziren eta aurten hirurak itxita. Bitxia da, Zumaiako Dia berriz, irekita aurkitu dut.

Piketeak Zestoa eta Azpeitia arteko bi gasolindegietara joaten harrapatu ditut. Ondorioa: Aviak itxi egin du eta Galpek irekita segi du. Dena dela, Zestoako Sansinenea industria guneko Avia irekita zegoen eta Zestoan herrian bertan dagoen Avia  ere bai. Gasolina hartzeko arazorik ez beraz.

Horixe inpresio orokorra, aurreko greban baino greba nabarmenagoa. Eguraldi ederra, jendea mendirako jantzita eta errepide lasaietan bizikletan.