7.000 sinadura bildu dituzte Gipuzkoako Aldundiaren garraio-murrizketaren kontra

  • Murrizketarik ez! herri plataformak Foru Aldundiak garraio publikorako egindako aurre proiektuaren aurka 7.000 sinadura bildu ditu, horietako 2.500 Tolosaldean.

Tolosaldeko Ataria @tolosaldeataria
2018ko martxoaren 07a
7.000 sinadura eraman dituzte Gipuzkoako Foru Aldundira (argazkia: Ataria).

Gipuzkoako Foru Aldundiak mahai gainean duen garraio publikoaren gaineko aurreproiektuak Tolosa eta Donostia artean zerbitzua ematen duen TSSTko hainbat linea bertan behera uztea aurreikusten du. Tolosaldea ez da murrizketak jasango lituzkeen eskualde bakarra, Buruntzaldean ere nabarmen egingo luke behera garraio publikoko zerbitzuak. Garayar Autobusak, Areizaga Anaiak eta Tolosaldeako TSST dira bi eskualdeetan zerbitzua ematen duten enpresak. Aldundiaren zirriborroaren arabera, hainbat linea bertan behera geratuko dira eta linea batzuetako geltokiak ere kenduko dituzte. Tolosaldean Tolosa-Irura-Villabona-Donostia ibilbideko T5 linean, %22ko murrizketa aurreikusi dute, eta asteburuetan ostiral gaueko zerbitzua kendu nahi dute.

Egoera horren aurrean Murrizketarik ez! herri plataformako kideak mobilizatzen hasi dira.

Plataforma erabiltzaileek eta kaltetuak izan daitezkeen enpresetako langileek osatzen dute. Informazioa konpartitzeaz gain, bi dira abiarazi dituzten ekimenak: batetik, aurreproiektuaren aurkako sinadura bilketa egin dute eta 7.000 bildu dituzte, horietako 2.500 Tolosaldean eta, bestetik, alegazioak ere egin dizkiote proiektuari.

Mikel Von wichmann (Hernani, 1991) plataformako kidea da eta zirriborroa nondik datorren azaldu du: "Gipuzkoako Foru Aldundiak 2017ko irailean aurkeztutako aurreproiektuak Buruntzaldea eta Tolosaldeako autobus zerbitzuek izugarrizko murrizketak jasan ditzaketela ikusi genuen. Zerbitzuen %20 eta %60 artean murriztu nahi dituzte".

110 langiletik 30 kalera

Murrizketen ondorioz bi izango dira kaltetu nagusiak: erabiltzaileak eta langileak. "Langileei dagokienez esan behar dugu, bi eskualdeetan 110 langile inguru daudela eta 30 bat langilek dute kalean geratzeko arriskua. Erabiltzaileak aipatzerakoan jada nahiko eraso jasaten dituzten taldeek jasango dute eragina; ikasleak, emakumeak eta langileak, oro har. Ez da guk esaten dugun zerbait, Foru Aldundiak emandako datu objektiboek diote autobus erabiltzaileen profila hori dela, berez zigortuta dauden sektoreak, alegia", esan du Von wichmannek.

Plataformako kideek bildutako 7.000 sinadurak pasa den asteartean eraman zituzten Aldundira, baina hori ez da aurreproiektuari jarritako muga bakarra; 5.000 alegazio ere aurkeztu dizkiote proiektuari.

"Foru Aldundiak zirriborroa atera du eta epealdi bat ireki du aurkako alegazioak egiteko. Eragile sozialetatik, sindikatuetatik, udaletatik eta norbanako bezala, herritarren eskutik, ia 5.000 alegazio egin dizkiote. Foru Aldundiak orain alegazioak erantzun beharko lituzke, baina asko dira eta ez dugu uste guztiak erantzungo dituenik. Gure ustez, dena den, udalek egindako alegazioei erantzun beharko liokete, eta baita sindikatuek langileei dagokienez egindakoei ere".

Aurreikuspenen arabera aurreproiektuaren behin betikotasuna urtea hastearekin eman behar zen, baina oraindik ez dute pausorik eman zentzu horretan, "presioa egiteko aukera dugu oraindik", esan du.

"Ondorioz egiten dugun irakurketa da aurreproiektuarekin jarraitzeko asmoa dutela, baina oraindik ez dutela behin betiko egin. Berez Foru Aldundiak formetan akatsak dituzten alegazioak onartu beharko lituzke, eta zentzu horretan, gutxienez badira aurreikusitako hainbat linea bertan behera utzi beharko lituzketenak, ezinezkoak baitira, zerbitzu horiek ematen dituzten enpresetako arduradunek ere esan dute ez direla posible", gaineratu du. Alegazioak ez ditu plataformak bakarrik jarri, zerbitzua ematen duten hiru enpresek ere jarri dituzte.

Zergatiak

"Foru Aldundiak esaten du gastu handia suposatzen duela orain arteko zerbitzuak mantentzea eta baliabideak arrazionalizatu behar dituela. Gure ustez egia da badirela asko erabiltzen ez diren zerbitzu batzuk, baina eskatzen dioguna da murrizketak egiterako garaian langileekin eta erabiltzaileekin adostasun batera iristea, bilerak deitu eta hitz egitera eseritzea", esan du plataformako kideak.

"Aurreproiektu honek aurreikusten duena da zein zerbitzu eta zein baldintzatan eman behar diren, eta horren aurrean hainbat enpresa aurkeztuko dira eta Foru Aldundiak lizitatuko ditu zerbitzuak. Guri ez zaigu horrenbeste axola zein enpresak emango duen zerbitzua, zerbitzua mantentzea eta zein baldintzetan emango den da arduratzen gaituena", gaineratu du.

Zentzu horretan langileen segurtasunak ere kezka sortzen diela esan du. "Ikusten dugu Foru Aldundiari ez zaiola inporta. Langileek behin eta berriz eskatu dituzte segurtasuna bermatzeko neurriak; linea batzuetan, Hernani inguruan sagardotegi garaian esaterako, erasoak izan dituzte... eta Foru Aldundiak ez du ezer aurreikusi aurreproiektuan segurtasunari dagokionez", azaldu du.

Bilera ere eskatu du Murrizketarik ez! herri plataformak Trafiko buruarekin, Marisol Garmendiarekin, bildu nahi du, eta uste du aurkeztutako sinadura guztiek aintzakotzat hartzeko modukoa egiten duela plataforma. "Gure ustez aurkeztutako sinadura guztiek legitimatu egiten gaitu interlokutore bezala bilera bat edukitzeko", esan du.

Albiste hau Tolosaldeko Atariak argitaratu du eta CC-by-sa lizentziari esker ekarri dugu ARGIAra.


Murrizketak kanaletik interesatuko zaizu...
2018-05-21 | ARGIA
Frantzian 'Herri Uholdea' deitu dute 26rako Macronen politiken kontra

Frantzian ezkerreko hainbat alderdi politiko, sindikatu eta gizarte mugimenduk dei egin dute datorren larunbatean, maiatzak 26, Emmanuel Macron presidenteak ezarri dituen politiken kontra borroka egiteko mobilizazioak burutzera. Marée Populaire [euskaraz libreki Herri Uholdea esan daitekeena] delakoak sakondu nahiko luke Nuit Debout mugimenduak irekitako ildoan.


2018-05-11 | Juan Mari Arregi
Zerga gutxiago aberatsei
Elkartasunetik gutxi duen "ezkutu fiskala"

EAJ eta PSEk, PPren laguntzaz elkartasunetik gutxi duen zerga-babesa edo “ezkutu fiskala” berpiztu dute Gipuzkoako aberatsenentzat, eta aldi berean menpekotasuna saihesteko laguntzak murriztu dizkie 4.330 familiari.


2018-04-04 | ARGIA
157 langile kaleratu eta gainerako 273ei soldata jaitsiko die Productos Tubularesek

Martxoaren 8tik greba mugagabean, Trapagarango Productos Tubulareseko langile-batzordea asteazken honetan bildu da zuzendaritzarekin eta azken honek bere asmoak jakinarazi dizkie. 430 langileko enpresan, 173 kaleratu nahi dituzte eta gainerakoei lan-baldintzak gogortu, lan-hitzarmena apurtuz.


2018-03-04
Bizimodu murritza normalizatu ez dadin

“Ez kezkatu pentsioengatik, zure txanda heltzen denean ez da jubilaziorik izango eta”. Zeinek ez du inoiz entzun horrelako sasi txantxarik? Gazte askok, kontzientzia soziala dutenetik, murrizketa baino ez dute ezagutu, “ongizate-estatua” totemaren etengabeko inausketa, besterik.


2018-02-22 | Miren Osa Galdona
Gipuzkoako autobus murrizketen aurka 7.000 sinadura bildu dituzte

Gipuzkoako Foru Aldundiak autobus zerbitzuak murrizteko hartutako joeraren aurrean sinadura bilketa abiatu du Murrizketarik Ez! herri plataformak. Otsailaren 27an sinadurok erregistratuko dituzte eta bide batez, protesta martxa antolatu dute.


2018-02-19 | Laborari
Maite Barberarena, erizainen grebaz: "Ez gara makina batekin ari, jendeak dira!"

Maite Barberarena erizain laguntzaile ari da Isturitzeko Pausa Leku zahar etxean. Menpekotasun egoeran diren zaharren zaintzan ari diren profesionalek urtarrilean greba handia egin zuten Frantziako Estatu osoan, beren eskuetan dauzkaten zaharrak hobeki zaintzeko lan baldintza egokiak eskatzeko.


2018-02-11 | Igor Agirre
Gipuzkoako autobus zerbitzu publikoa
Zuk diozu aldaketa, nik diot murrizketa

Gipuzkoako zati handi bati autobus garraio publikoa eskaintzen dion Lurraldebus zerbitzuan lineak eta maiztasunak birmoldatzen ari da Gipuzkoako Foru Aldundia. Debagoieneko, Buruntzaldeko eta Tolosaldeko herrietan kezka handia sortu du Diputazioaren egitasmoak, murrizketak dakartzalako haien esanetan.


2018-01-24 | ARGIA
Murrizketa "galaktikoak" salatu ditu Berri Otxoak taldeak Barakaldon

Darth Vader Barakaldon izan zen astearte goizean, guardia inperialeko bi soldadurekin batera: mozorro horiek baliatu ditu Berri Otxoak taldeak Barakaldoko Udalaren aurrekonto proiektua salatzeko.


2018-01-11 | Andoni Mikelarena
Hildako bat eta ehunka atxilotu murrizketen aurkako protestetan Tunisian

Tunisiako gobernuburuak murrizketak egingo dituela adierazi eta urtea hastearekin batera milaka herritar kalera atera dira austeritate politiken aurka. Istilu handiak izan dira eta pertsona bat hil da.


2018-01-09 | Andoni Mikelarena
Lanbidek Barakaldon duen bulego bateko zuzendaria akusatuen aulkira eramango du Berri Otxoak-ek

Gasteizko administrazio auzitegian deklaratuko du urtarrilaren 15ean, Barakaldoko Beurko auzoko Lanbideren bulegoko zuzendariak, auzotar baten salaketaren harira.


Azkenak
EGILEA
Eguneraketa berriak daude