argia.eus
INPRIMATU
400 furgoneta dispertsioaren amaiera exijitzeko

  • “Azken bidaia izan dadila” lemapean, 400 furgoneta inguruk hartu dute parte larunbatean Larrabetzu eta Bilbo artean eginiko Furgo Martxan; euskal presoen sakabanaketarekin amaitu behar dela aldarrikatzea eta “salbuespen neurriek” eragiten duten elkartasuna omentzea izan dute xede.

Iker Oñate Aiastui @iker_onate 2016ko maiatzaren 09a
Preso bakoitzeko gutxienez furgoneta bat bildu nahi zuten antolatzaileek. (Arg: Mirentxin Gidariak)

Preso bakoitzeko gutxienez furgoneta bat bildu nahi zuten antolatzaileek, “astebururo errepideetan dauden senide eta lagunak ikusarazteko” asmoz. Kontent azaldu dira helburua lortuta: “400 furgoneta bildu nahi genituen, eta lortu dugu. 400 furgoneta azken bidaia izan dadin”.

Gaineratu dute Mirentxin Gidariak boluntario sareak bere esku dagoen guztia egiten jarraituko duela dispertsioarekin amaitu bitartean, “senideek bisitak arazorik gabe egin ditzaten”.

Ekimen ugari antolatu dute ibilbidean, eta hainbat eragileren babesa ere jaso dute, besteak beste, Basurtuko langileek elkarretaratzea egin dute ospitale atarian, Furgo Martxari harrera eginez.