1989an euskarazko egunkari baten beharra gero eta nabarmenagoa zen, gero eta irmoagoa  hori aurrera ateratzeko asmoa. Batetik, Eusko Jaurlaritzari eskatzen zitzaion subentzio lerroa zabal zezala halako proiektuak laguntzeko, eta bestetik, euskal prentsak behar zuen babesa lortzeko kanpaina ugari egin ziren.

Argiak bete-betean parte hartu zuen Euskaldunon Egunkariaren sorreran. 70eko hamarkada amaieran gaztelerari lehentasuna ematen zioten hainbat egunkari sortu ziren, eta ondorioz euskal aldizkari dekanoa krisi sakonean sartu zen. Hala ere, taldetxo txiki baten bultzadaz aurrera atera zen Argia –Zeruko Argia izateari utzita–, eta hori bakarrik ez, euskarazko egunkari bat sortzeko indarrak eta azpiegiturak metatu zituen. 80ko hamarkadaren amaieran Antza inprimategia sortzea izan zen giltzarrietako bat, baita informatikaren arloan urratsak ematea ere.

Hala, 1989ra animoz gogo berrituta iritsi zen euskal kazetaritza, sektorearen bazterretik ateratzeko gai zela sinetsita. Testuinguru horretan eman ziren lehenengo Argia Sariak.

Argia Eguna eta Argia Sariak

Urte hartako azaroan, zenbait euskal aldizkaritako ordezkariek Donostian egindako agerraldian, ordura arte urtero egiten zen Argia Egunari “Euskal Prentsaren Eguna” leloa gehituko ziotela iragarri zuten. Egun hura aitzaki hartuta, euskal kazetaritzaren inguruan hitzaldiak, mahai inguruak eta sinadura bilketa antolatu zituzten, baita lehenengo Argia Euskal Prentsaren Sariak ere.

Argia Eguna 1982an sortu zen. Euskal Herriko txoko askotan jarritako mahaietan Argiaren aleak eta beste hainbat produktu saltzen ziren egun horretan, aldarrikapen giroan; ahalik eta euskaltzale gehienengana hurbiltzea zen asmoa. Argia Sariak, berriz, euskal komunikazioaren eragileak elkartzeko egin ziren, modu zehatzagoan.

Ekitaldien antolaketan arreta osoa jartzearren, langileek erabaki zuten aurreko asteko zenbakirik ez ateratzea. Baina egoera politikoak dena nahasi zuen enegarren aldiz. 1989ko azaroaren 20an Josu Muguruza HBko parlamentaria eta kazetaria hil zuten gerra zikinarekin loturiko atentatuan. Argiak ale berezia kaleratu zuen, bere kolaboratzaile zenaren hilketa salatuz. Egun batzuk geroago, Lasarte-Oriako Txartel Txoko jatetxean egin zen estrainekoz sari banaketa; Josu Muguruzari sari postumoa eman zioten.

1990ean Euskaldunon Egunkaria sortu zelarik, Argiako erredakzioa mehartuta geratu zen halabeharrez. Astekariak, euskal prentsaren munduan bere burua berriz birkokatu behar izan zuen, baita lortu ere, etav Argia Sariak dira horren erakusgarri.

Urtetik urtera sona handiagoa hartu zuten sariek. Elkarte gastronomikotik, Txitxardin Beltxa jatetxera igaro zen ekitaldia eta musika emanaldiz hornitu. 1999an Sareko Argia saria banatzen hasi ziren; ez kasualitatez. Bi urte lehenago sortu zuen astekariak webgunea, Ttipi-Ttaparen bideari jarraiki eta erdarazko medio askoren aurretik.

Azken urteetan bideogintzak garrantzi handia hartu du Argiako edukietan, baita sarietan ere. Ekitaldirako berez sorturiko bideoak eta streamingak egin dira, esaterako. Hain justu, artikulu hau ilustratzeko erabili ditugun argazkiekin eta beste askorekin, Argia Sarien ibilbidea laburbiltzen duen bideoa ikusgai dago gure webgunean.