Alemaniako poliziak 25 ultra-eskuindar atxilotu ditu asteazken goizean. Ustez erakunde terrorista bateko kideak dira eta estatu-kolpea ematea zuten helburu, Fiskaltzak jakinarazi duenez. Atxilotuen artean nobleziako kide eta politikariak daude, AfD alderdiko kide ohi Birgit Malsack-Winkemann epailea tartean. 3.000 poliziak parte hartu dute operazioan.
Fiskaltzaren arabera, iazko azaroa baino lehen sortu zuten aipatu erakundea, Taz hedabide alemaniarrean irakurri daitekeenez. "Alemaniako estatu-ordena deuseztu eta haren ordez haien Estatu-eredua ezartzea du helburu, zeinaren ildo nagusiak jada finkatu dituzten. Erakundeko kideak jakitun dira plan hori soilik gauzatu daitekeela bide militarra eta indarkeria baliatuta". Erakundearen organo nagusia "kontseilu" bat litzateke, eta "beso armatua" ere izango luke.
Taldeak zein izen duen ez dute argitara eman. "Konspirazio-teoriak izan ditzake oinarri", Fiskaltzaren hitzetan. Atxilotuak Alemaniako konstituzioa obeditzen ez duen 'Reichsbürger' (Reicheko herritarrak) deitutako mugimenduko kideak dira, eta haien artean indar armatuetako (Bundeswehr) kide ohiak daude, baita Birgit Malsack-Winkemann AfD eskuin muturreko alderdiko politikaria ere.
Sarekadan 3.000 poliziak hartu du parte. Atxiloketa guztiak Alemaniako hainbat hiritan egin dituzte, bi salbu –pertsona bat Austrian atxilotu dute eta beste bat Italian–. Asteazken eguerdian operazioa zabalik dago oraindik; beste 27 susmagarri daude zerrendan, Fiskaltzak jakinarazi duenez.